“Təhsildə İnkişaf və İnnovasiyalar üzrə IX Qrant Müsabiqəsi” çərçivəsində həyata keçirilən “Məktəblərdə Aikido Klubları” qrant layihəsi uğurla başa çatıb. Layihə 191 nömrəli tam orta məktəbin ibtidai sinif müəllimi Xuraman Babayeva tərəfindən icra olunub.
Layihənin əsas məqsədi məktəblilər arasında aykido idman növünü təşviq etmək, onların özünümüdafiə bacarıqlarını inkişaf etdirmək, fiziki və psixoloji hazırlıqlarını gücləndirmək, eyni zamanda sağlam həyat tərzinin formalaşmasına töhfə vermək olub.
Layihə çərçivəsində məktəblilər üçün nəzəri və praktiki aykido məşğələləri təşkil edilib. Ümumilikdə 24 dərs ərzində iştirakçılar aykidonun əsas texnika və qaydaları ilə tanış olub, çeviklik, koordinasiya, dözümlülük və özünənəzarət bacarıqlarını inkişaf etdiriblər. Təlimlər zamanı şagirdlərdə intizam, məsuliyyət və komanda ruhu kimi vacib keyfiyyətlərin formalaşdırılmasına xüsusi diqqət yetirilib.
Layihənin yekununda məktəbdə bağlanış mərasimi və Aikido Festivalı keçirilib. Festival çərçivəsində Aikido klubunun üzvləri təlim müddətində qazandıqları bilik və bacarıqları nümayiş etdirərək müxtəlif texnika və məşq elementləri üzrə çıxışlar ediblər. Şagirdlərin nümayiş etdirdiyi çıxışlar tədbir iştirakçıları tərəfindən böyük maraqla qarşılanıb.
Layihənin nəticəsi olaraq iştirakçıların aykido idman növünə marağı artıb, onların fiziki hazırlığı və özünümüdafiə bacarıqları inkişaf edib. Eyni zamanda layihə məktəblilər arasında sağlam həyat tərzinin təşviqinə və idman mədəniyyətinin formalaşmasına mühüm töhfə verib.
