Azərbaycan xalqının Ümummilli Lideri Heydər Əliyev ömrünü doğma Vətənə və xalqa xidmətə həsr edib. Dahi şəxsiyyətin zəngin siyasi-fəlsəfi irsi, ideyaları, dövlətçilik təcrübəsi ölkəmizin tərəqqisində müstəsna rola malikdir. Fenomenal şəxsiyyət, nadir natiqlik istedadına sahib dövlət xadimi Heydər Əliyev Azərbaycan dilinin inkişafını, zənginləşməsini, saflığının qorunmasını daim diqqətdə saxlayırdı.
AZƏRTAC xəbər verir ki, bu fikirləri Milli Məclisin Gənclər və idman komitəsinin sədri Şahin İsmayılov söyləyib.
Zaman keçdikcə dahi şəxsiyyət Heydər Əliyevin uzaqgörən siyasətinin, habelə taleyüklü məsələlərlə bağlı verdiyi müdrik qərarların tarixi əhəmiyyətinin daha aydın göründüyünü söyləyən komitə sədri deyib: “Dilə xalqın milliliyini, mənəvi dəyərlərini, mədəniyyətini yaşadan amil kimi yanaşan dahi şəxsiyyət siyasi hakimiyyətdə olduğu dövrlərdə ana dilinin daha da inkişaf etdirilməsi məqsədilə mühüm addımlar atdı. Məhz Ulu Öndərin təşəbbüsü, qətiyyətli iradəsi ilə 1978-ci ildə Azərbaycan Sovet Sosialist Respublikasının Konstitusiyasına Azərbaycan dilinin dövlət dili olması haqqında maddə əlavə edildi. Ağır dövrdə belə bir qərarın qəbulu Ümummilli Liderin nüfuzu və qətiyyəti sayəsində mümkün oldu. Ulu Öndərin doğma xalqına sevgisindən qaynaqlanan bu addım ana dilimizin qorunmasında tarixi əhəmiyyətə malikdir”.
Komitə sədri bildirib ki, xalqın təkidli tələbi ilə siyasi hakimiyyətə qayıdan Ulu Öndər Heydər Əliyevin rəhbərliyi ilə ölkəmizin dil siyasətinin birmənalı şəkildə formalaşdırılması, ana dilinin dövlət dili kimi tətbiqi və bu işin təkmilləşdirilməsi istiqamətində zəruri addımlar atıldı. Müstəqil Azərbaycanın 1995-ci ildə qəbul olunmuş ilk Konstitusiyasında Azərbaycan dilinin Azərbaycan Respublikasının dövlət dili kimi təsbit olunmasını xüsusi qeyd etmək lazımdır. “O zaman Konstitusiya hazırlanarkən dövlət dilinin necə adlandırılması ilə bağlı müxtəlif təkliflər irəli sürülürdü. Ulu Öndər müstəqil dövlətimizin yeni Konstitusiya layihəsini hazırlayan komissiyanın 5 noyabr 1995-ci ildə keçirilən iclasında məsələ ilə bağlı qətiyyətli mövqeyini ifadə edərək dedi: “Mən hər bir dilə hörmət edirəm və ehtiramımı bildirirəm. Hesab edirəm ki, Azərbaycan dili ilə fəxr edə bilərik. Çünki bu, zəngin dildir, artıq dünyada tanınmış dildir. Xalqımızın da, dilimizin də adı tanınıb. Bu, reallıqdır”. Eyni zamanda, Ümummilli Liderin “Dövlət dilinin tətbiqi işinin təkmilləşdirilməsi haqqında” və “Azərbaycan əlifbası və Azərbaycan dili gününün təsis edilməsi haqqında” fərmanları, eləcə də “Azərbaycan Respublikasında dövlət dili haqqında” Qanun ölkəmizin dil siyasətinin uğurla həyata keçirilməsini, Azərbaycan dilinin dünya azərbaycanlılarının ünsiyyət vasitəsinə çevrilməsini, gənclərin ana dilinə hörmət və sevgi ruhunda tərbiyə olunmasını təmin etdi.
“Azərbaycan Respublikasının Prezidenti cənab İlham Əliyevin müdrik rəhbərliyi ilə ötən illər ərzində Ulu Öndərin bu sahədə müəyyənləşdirdiyi siyasət uğurla davam etdirilib. Bu xüsusda Azərbaycan dilinin zamanın tələblərinə uyğun istifadəsi və azərbaycançılıq ideologiyası əsasında inkişafı, ədəbi dilin normalarına ciddi surətdə əməl edilməsi, bu sahədə yüksəkixtisaslı kadrların hazırlanması istiqamətində mühüm addımlar atılıb. Azərbaycan dilinin istifadəsinə və tədqiqinə dövlət qayğısının artırılması, ölkədə dilçilik araşdırmalarının əsaslı şəkildə yaxşılaşdırılması, dilçiliyin aparıcı istiqamətlərində fundamental tədqiqat işlərinin həyata keçirilməsi daim diqqətdə saxlanılıb, – deyə Şahin İsmayılov vurğulayıb.
