Azərbaycan Respublikasının Gənclər Fondu tərəfindən “Konstitusiya və Suverenlik İli” çərçivəsində elan olunmuş qrant müsabiqəsinin qalibi olan “İrsdən Hüquqa: Heydər Əliyev və Biz” layihəsi 5–6–7 fevral tarixlərində uğurla həyata keçirilib. Layihə Azərbaycan Respublikasının Gənclər Fondunun dəstəyi ilə reallaşdırılıb.
Layihənin əsas məqsədi Ümummilli Lider Heydər Əliyevin hüquqi dövlət quruculuğundakı tarixi rolunu, xüsusilə Azərbaycan Respublikasının Konstitusiyasının hazırlanması prosesindəki xidmətlərini gənclər arasında təbliğ etmək və onların hüquqi savadlılıq səviyyəsini artırmaq olub. Eyni zamanda layihə gənclərdə hüquqi düşüncə tərzinin formalaşdırılması, Konstitusiya dəyərlərinə hörmət hissinin gücləndirilməsi, vətəndaş məsuliyyətinin təşviqi və dövlətçilik ənənələrinin aşılanmasını hədəfləyib.
Layihə çərçivəsində ilk seminar 5 fevral tarixində Qazax Dövlət Sosial-İqtisadi Kollecində təşkil olunub. “Konstitusiya və hüquqlarımız” mövzusunda keçirilən seminar BDU Qazax filialının İctimai və təbiət fənləri kafedrasının baş müəllimi Ülviyyə Bayramovanın təqdimatında baş tutub. İnteraktiv formatda keçirilən seminarda Konstitusiyanın mahiyyəti, vətəndaşların əsas hüquq və azadlıqları barədə geniş müzakirələr aparılıb.
6 fevral tarixində layihənin ikinci seminarı BDU Qazax filialında tələbələr üçün təşkil edilib. “Heydər Əliyev və hüquqi dövlət quruculuğu” mövzusuna həsr olunan seminarı İctimai və təbiət fənləri kafedrasının müəllimləri İndira Vəliyeva və Ülviyyə Bayramova aparıblar. Çıxışlarda Ümummilli Lider Heydər Əliyevin dövlətçilik strategiyası, hüquqi islahatlar, qanunun aliliyi prinsipi və müasir hüquqi dövlət modelinin formalaşması ətraflı təhlil olunub.
Tədbirdə universitetin Tələbələrlə və ictimaiyyətlə əlaqələr şöbəsinin müdiri Qasım Əliyev çıxış edərək bu cür maarifləndirici layihələrin gənclərin dünyagörüşünün formalaşmasında mühüm rol oynadığını bildirib və layihə təşəbbüsünü yüksək qiymətləndirib.
Layihənin sonuncu seminarı 7 fevral tarixində “Vətəndaş məsuliyyəti və hüquqi savadlılıq” mövzusunda keçirilib. Seminar zamanı hüquqi biliklərin cəmiyyət həyatındakı rolu, hüquq və vəzifələrin qarşılıqlı əlaqəsi və gənclərin ictimai fəallığının əhəmiyyəti geniş şəkildə müzakirə olunub.
Layihə çərçivəsində keçirilən “Gənclərin gözü ilə hüquqi irs” adlı esse müsabiqəsinin nəticələri də elan edilib. Müsabiqənin qalibləri BDU Qazax filialının Tarix ixtisası III kurs tələbəsi Ümid Əhməyev (I yer), Tarix ixtisası II kurs tələbəsi Sevin Ağayeva (II yer) və Turizm və otelçilik ixtisasının III kurs tələbəsi Ələkbər Hüseynov (III yer) olub.
Mükafatlandırma mərasimində layihə rəhbəri Pəri İbrahimova qalibləri təbrik edib, onların hüquqi mövzulara göstərdikləri marağı yüksək qiymətləndirərək diplom və xüsusi hədiyyələr təqdim edib.
Qeyd edək ki, “İrsdən Hüquqa: Heydər Əliyev və Biz” layihəsi gənclər arasında hüquqi maarifləndirmənin gücləndirilməsinə, dövlətçilik dəyərlərinin təbliğinə və məsuliyyətli vətəndaş mövqeyinin formalaşdırılmasına mühüm töhfə verib.
