Azərbaycan Prezidenti İlham Əliyevin Münhen Təhlükəsizlik Konfransında iştirakı və Türkiyəyə səfəri 7 fevralda keçirilən prezident seçkilərindən yaranan yeni dövrün başlanması baxımından çox böyük tarixi siyasi əhəmiyyət kəsb edir.
Bunu Ölkə.Az-a açıqlamasında deputat Şahin İsmayılov deyib.
Deputat bildirib ki, Azərbaycan Prezidenti İlham Əliyevin bu səfərlərini aşağıdakı kimi dəyərləndirə bilərik:
“Prezident İlham Əliyevin Münhen Təhlükəszilik Konfransında iştirakı, keçirdiyi görüşlər və verdiyi mesajlar sübut etdi ki, kollektiv Qərb Azərbaycanın 7 fevral prezident seçkilərindən sonra Cənubi Qafqazda yaratdığı yeni reallığı qəbul edib onunla hesablaşırlar.
Münhen səfəri eyni zamanda seçkilərdən öncə bəzi Qərb ölkələrinin Azərbaycana qarşı həyata keçirmək istədiyi məkrli planlarının iflasa uğradılması idi. Azərbaycan Prezidenti yürütdüyü qətiyyətli və cəsarətli diplomatiyası ilə Qərbdəki anti-Azərbaycan mərkəzləri və ermənilərin havadarlarını bir daha öz oyun meydanında ağır hesabla məğlubiyyətə uğratdı. Ermənistanın bölgədə əhəmiyyətə malik olmayan ölkə olduğunu və Azərbaycana qarşı bundan sonrakı çirkli planların məhvə məhkum olacağını ortaya qoydu”.
Prezidentin qardaş Türkiyəyə səfərinə gəldikdə deputat bildirib ki, bu, bir daha iki ölkənin qardaşlığının necə möhkəm dayaqlara malik olduğunun dünyaya nümayişi idi: “Bu mesajları aşağdakı kimi oxumaq lazımdır:
– Azərbaycan-Türkiyə birliyi əbədi və sarsılmazdır. Heç bir qüvvə bu birliyi poza bilməz. Bu birlik getdikcə daha da güclənib möhkəmlənəcək;
– Azərbaycan-Türkiyə birliyi təkcə iki ölkənin gələcək inkişafı baxımından deyil, bütövlükdə bölgə, türk dünyası, həmçinin Avrasiya coğrafiyası üçün mühüm əhəmiyyət kəsb edir.
– Azərbaycan-Türkiyə birliyindən və bu əməkdaşlıqdan ancaq və ancaq hamı qazana bilər.
İlk növbədə bu səfərdən və verilən mesajlardan Ermənistan və onun havadarları düzgün nəticə çıxarmalıdırlar. Ermənistan tərəfi verilən mesajları düzgün oxuyub nə qədər tez bölgədə uzunmüddətli sülhün əldə olunması üçün açılan fürsət pəncərəsindən faydalansa daha yaxşı olar. Ermənistan tərəfi bundan faydalansa, qazanacaq, əks təqdirdə yenə də itirən tərəf olacaq. Çünki fürsət pəncərələri hər zaman və ya uzunmüddətli olmur. Kim ondan zamanında faydalandısa qazanacaq. Fürsəti əldən verdisə itirəcək. Ona görə də Ermənistan və onun havadarları anlamalıdır ki, növbəti dövr “türk əsridir” və bu proses geriyədönməz xarakter alıb. Bunu bütün dünya gücləri görür və siyasətlərini də buna uyğun müəyyənləşdirirlər. Güclü axına qarşı çıxmaq isə bilərəkdən özünü məhvə sürükləmək və ya sui-qəsd etmək deməkdir. Əminəm ki, Azərbaycanla Türkiyənin sıx əməkdaşlığı beynəlxalq səviyyədə türk dövlətlərinin güclü bir mərkəz kimi ortaya çıxması ilə nəticələnəcək. Bu birlik eyni zamanda islam dünyasının həmrəyliyinə, güclənməsinə öz töhfəsini verəcək”.
