“İMZA” İctimai Birliyi 2024-cü ildə görəcəyi işlərlə bağlı yeni “Yol xəritəsi”ni müzakirə edib.
İnformasiya.az xəbər verir ki, “İMZA” Sosial İnkişafa Dəstək İctimai Birliyinin Beynəlxalq və İctimaiyyətlə əlaqələr departamentinin direktoru Elnar Məmmədlinin verdiyi məlumata görə, İB-nin İdarə Heyətinin 2023-cü ilin yekunları və 2024-cü ildə qarşıya qoyulan vəzifələrə həsr olunmuş yığıncağında sədr Xəyyam Əsgərov hesabat məruzəsi ilə çıxış edib. Bildirib ki, “İMZA” komandası həm sosial şəbəkələr üzərindən, həm də İctimai Birlik olaraq ötən ildə də xeyli iş görüb. Sosial şəbəkələrdə Prezident cənab İlham Əliyevin və Birinci vitse-prezident Mehriban xanım Əliyevanın fəaliyyəti haqqında, Azərbaycanda cərəyan edən mühüm ictimai-siyasi, mədəni hadisələr barədə məlumatlar, xəbərlər, video-xəbərlər “İMZA” səhifələrində mütəmadi olaraq paylaşılıb və böyük maraqla qarşılanıb. Qeyd edək ki, hazırda onların baxış statistikası milyonlarla ölçülməkdədir. Sosial şəbəkə səhifələrimiz “göy işıq”la təmin edilib.
Ötən il “İMZA” İB-i bir sıra əhəmiyyətli tədbirlər də keçirib. Xüsusi ilə Ulu öndər Heydər Əliyevin 100 illik yubileyinə həsr olunmuş beynəlxalq elmi-praktiki konfrans ictimaiyyətin diqqətini cəlb edib. “Heydər Əliyev-Böyük Lider” adlı konfransda Azərbaycanın millət vəkilləri, ziyalıları, ictimaiyyət nümayəndələri ilə yanaşı, Türkiyə, Rusiya, Pakistan, ABŞ, Fransa, Almaniya, İtaliya və başqa ölkələrdən tanınmış ictimai-siyasi xadimlər, deputatalar, vaxtı ilə Ulu öndərimizlə işləmiş səfirlər iştirak ediblər. Tədbir yerli və beynəlxalq KİV-də geniş işıqlandırılıb. Bundan başqa, 2023-cü ildə 20 yanvar, Xocalı soyqırımı, Müstəqillik günü, Milli Qurtuluş günü və digər mühüm hadisələrlə əlaqədar “İMZA” İB-nin xətti ilə ənənəvi toplantılar, görüşlər keçirilib.
Bir məqamı xüsusi ilə vurğulamaq lazımdır ki, bu gün “İMZA”nın sıraları daha da genişlənməkdədir. Vətəndaşlarımızdan “İMZA”ya üzv olmaq üçün çoxsaylı müraciətlər daxil olmaqdadır. Bunu nəzərə alan “İMZA” İB-nin İdarə heyəti həmin müraciətlərə baxılması üçün qərar qəbul edib. Bu il artıq prosesə start verilib. Hazırda “İMZA” İctimai Birliyinin müasir dizayn və məzmuna malik yeni saytı hazırlanır. Arzu edənlər sayt vasitəsi ilə də üzvlük üçün müraciət imkanı qazanacaqlar. “İMZA”-çılar 2024-cü ildə də bu istiqamətdə səylərini daha da artıracaqlar və artıq bu məqsədlə “İMZA” İB-nin “Yol xəritəsi” də hazırlanmaqdadır. X.Əsgərov İctimai Birliyin Türkiyə təmsilçisi fövqəladə və səlahiyyətli səfir Hulusi Kılıça təşkilatın işində fəal iştirakına, “İMZA” dəyərlərinə bağlılığına və İctimai Birliyin dünyada tanınmasında göstərdiyi xidmətlərə görə xüsusi təşəkkür edib. “İMZA” İB-nin Beynəlxalq və İctimaiyyətlə əlaqələr departamentinin fəaliyyətinin İdarə heyəti tərəfindən müsbət qiymətləndirildiyini vurğulayıb. Departamentin beynəlxalq tədbirlərin təşkilindəki rolunu xüsusi ilə qeyd edib. Sonra “İMZA” Sosial İnkişafa Dəstək İctimai Birliyinin Türkiyə təmsilçisi, qardaş ölkənin Azərbaycandakı sabiq fövqəladə və səlahiyyətli səfiri Hulusi Kılıç çıxış edib. Görülən işləri yüksək qiymətləndirib. “Yol xəritəsin”ə dair faudalı təkliflərini açıqlayıb. Tədbirdə “İMZA” İB-nin sədr müavinləri Xəyal Bəşirov, Nazim Bayandurov və Abdulla Hüseynov da müzakirə olunan məsələlər barəsində təkliflər irəli sürüblər. Yığıncaqda digər cari məsələlər də müzakirə olunub, müvafiq qərarlar qəbul edilib.
