2025-ci il Azərbaycan idmanı üçün tarixi nailiyyətlərlə yadda qalmışdır. Prezident İlham Əliyevin ilin idman yekunlarına həsr olunmuş mərasimdə səsləndirdiyi fikirlər bir daha sübut etdi ki, ölkəmizdə idmanın inkişafı təsadüfi deyil, ardıcıl və məqsədyönlü dövlət siyasətinin məntiqi nəticəsidir. Dövlət başçısının qeyd etdiyi kimi, bu il Azərbaycan idmançıları beynəlxalq yarışlarda 2000-dən artıq medal, o cümlədən 600-dən çox qızıl medal qazanaraq rekord göstəriciyə imza atmışlar. Keçən illə müqayisədə əldə olunan bu artım idmana göstərilən diqqətin və yaradılan imkanların real nəticəsidir.
Prezident İlham Əliyev çıxışında vurğulamışdır ki, idmanın inkişafı təkcə medallar və titullarla ölçülmür. Əsas məqsəd sağlam gənc nəslin yetişdirilməsidir. Sağlam gənclik isə ölkənin gələcək inkişafının, güclü dövlətin və sağlam cəmiyyətin əsas təminatıdır. Uşaqlıqdan idmana marağın formalaşdırılması gələcək idman uğurlarının təməlini qoymaqla yanaşı, fiziki və mənəvi cəhətdən sağlam vətəndaşların yetişməsinə xidmət edir. Bu baxımdan, idman siyasəti gənclər siyasətinin ayrılmaz tərkib hissəsidir.
Dövlət başçısının xüsusi olaraq diqqət çəkdiyi mühüm məqamlardan biri də gənclərin vətənpərvərlik ruhunda tərbiyəsidir. Prezident İlham Əliyev vurğulamışdır ki, gənclərin fiziki hazırlığı ilə mənəvi saflığı vəhdət təşkil etməlidir. Yalnız bu halda ölkənin davamlı və uğurlu inkişafı mümkündür. Azərbaycan cəmiyyətində hökm sürən həmrəylik və vətənpərvərlik mühiti, xüsusilə son illərdə baş verən tarixi hadisələr fonunda, bu siyasətin düzgünlüyünü bir daha təsdiqləyir. İdman isə gənc nəslin milli ruhda formalaşmasında mühüm rol oynayır.
2025-ci ilin əsas idman hadisələrindən biri MDB ölkələrinin üçüncü Oyunlarının Azərbaycanda yüksək səviyyədə təşkili olmuşdur. Bu Oyunların özəlliyi ondan ibarət idi ki, yarışlar təkcə Bakıda deyil, ölkənin bir neçə şəhərində, o cümlədən Gəncədə və Xankəndidə keçirilmişdir. Minlərlə xarici qonağın iştirakı ilə bölgələrdə belə mötəbər idman tədbirinin təşkili Azərbaycanın geniş imkanlarını və yüksək təşkilatçılıq bacarığını nümayiş etdirmişdir. İdmançılarımızın komanda hesabında ikinci yeri tutması isə ölkə idmanının gücünü bir daha sübut etmişdir. Bu kimi beynəlxalq tədbirlər Azərbaycanın idman potensialını və müsbət imicini dünya ictimaiyyətinə təqdim edir.
İlin digər əlamətdar hadisəsi ölkəmizdə ilk dəfə UFC üzrə beynəlxalq turnirin keçirilməsi olmuşdur. Dünya miqyasında ən populyar idman yarışlarından biri olan UFC-nin Bakıda təşkili Azərbaycanın qlobal idman xəritəsində mövqeyinin daha da möhkəmləndiyini göstərir. Minlərlə iştirakçının və dünya mediasının diqqət mərkəzində olan bu turnir ölkəmizin müasirliyi, təhlükəsizliyi və yüksək infrastruktur imkanlarının parlaq nümunəsi kimi dəyərləndirilmişdir.
Formula 1 Azərbaycan Qran-Prisi də ölkəmizin beynəlxalq tanıtımında xüsusi rol oynamaqda davam edir. Prezident İlham Əliyevin qeyd etdiyi kimi, ilk Formula 1 yarışından sonra ölkəmizə gələn xarici turistlərin sayı 20 faiz artmışdır. Bu il yarışın bütün biletlərinin əvvəlcədən satılması və 20 minə yaxın tamaşaçının yarışı canlı izləməsi tədbirə olan marağın göstəricisidir. Yarım milyardlıq televiziya auditoriyası qarşısında Bakının gözəlliyinin nümayiş etdirilməsi ölkəmizin effektiv təqdimatıdır və turizmin inkişafına güclü təkan verir.
Azərbaycan idmanının inkişafı təkcə yay idman növləri ilə məhdudlaşmır. İlk dəfə olaraq Qusar rayonunda, Şahdağ Xizək Turizm Mərkəzində Xizək üzrə Dünya Kubokunun keçirilməsi ölkəmizin qış idman növləri sahəsində də mühüm nailiyyətidir. Şahdağ artıq beynəlxalq xizək idmanı təqviminə daxil olmuşdur. İnfrastrukturun genişlənməsi, yeni trasların salınması və özəl sektorun artan marağı bölgədə minlərlə iş yerinin yaradılmasına səbəb olmuş, yerli əhalinin sosial rifahına müsbət təsir göstərmişdir.
Bununla yanaşı, ölkə üzrə güclü nəqliyyat və turizm infrastrukturu – beynəlxalq hava limanları, dəmir yolu xətləri, müasir yollar, Qarabağ və Şərqi Zəngəzurda aparılan genişmiqyaslı bərpa və quruculuq işləri idman tədbirlərinin təşkili üçün yeni imkanlar yaradır. Artıq azad edilmiş ərazilərdə də avarçəkmə və digər idman yarışlarının keçirilməsi Azərbaycanın idman coğrafiyasının genişləndiyini göstərir.
2025-ci ilin daha bir tarixi hadisəsi Bakı şəhərinin “Dünyanın İdman Paytaxtı” seçilməsidir. Bu nüfuzlu ad Azərbaycanda idmanın inkişafına verilən beynəlxalq qiymətin təzahürüdür. Prezident İlham Əliyev əminliklə bildirmişdir ki, Azərbaycan bu şərəfli adı ləyaqətlə daşıyacaq və idman sahəsində əldə olunan uğurlar davamlı olacaq. Sonda dövlət başçısı vurğulamışdır ki, Azərbaycanın idman şöhrətini ucaldan idmançıların və mütəxəssislərin əməyinin qiymətləndirilməsi artıq uzun illərdir davam edən ədalətli və şəffaf bir ənənədir.
Prezident İlham Əliyevin rəhbərliyi ilə həyata keçirilən məqsədyönlü dövlət siyasəti nəticəsində Azərbaycan idmanı yeni zirvələrə doğru inamla irəliləyir və ölkəmiz beynəlxalq idman ailəsində layiqli yerini daha da möhkəmləndirir.
Zaur Şükürov
Milli Məclisin deputatı
