Avropa İttifaqının maliyyələşdirdiyi, BMT-nin Əhali Fondu və BMT-nin Qadınlar üzrə Agentliyinin birgə həyata keçirdiyi “Avropa İttifaqı Gender Bərabərliyi naminə: birlikdə gender stereotipləri və gender əsaslı zorakılığa qarşı” proqramı çərçivəsində cəmiyyətdə mövcud olan gender stereotipləri və ayrı-seçkiliyin qarşısının alınmasına yönəlmiş fəaliyyətlərdə gənclərin iştirakını gücləndirmək məqsədilə icmaların maarifləndirilməsi sessiyaları və tədbirlərin təşkili və keçirilməsi başlanılıb.
Hər il dünyada 25 noyabr – 10 dekabr tarixləri arasında gender əsaslı zorakılığa qarşı 16 Günlük Fəallıq kampaniyası həyata keçirilir. Bu kampaniyanın məqsədi gender əsaslı zorakılıqla mübarizəyə daha çox diqqət cəlb etmək və cəmiyyətlər, icmalar və fərdlər səviyyəsində bu mövzuya həssaslığı daha da artırmaqdan ibarətdir.
“GenderLab” MMC tərəfindən kampaniya müddətində yerli icmalarda görüşlər təşkil edilərək gender bərabərliyi, gender əsaslı zorakılığa qarşı mübarizə mövzularında müzakirələr aparılır. Görüşlər Bakının ümumtəhsil məktəblərində, universitet tələbələri ilə, gender əsaslı zorakılıq qurbanları üçün sığınacaqda təşkil edilmişdir. Gəncə şəhərində şagirdlərin, tələbələrin, gənc rəssamların, Vətəndaş Cəmiyyəti üzvlərinin, Nizami bələdiyyəsinin iştirakı ilə təşkil edilmiş Dəyirmi masada gender bərabərliyi, gender əsaslı zorakılığa qarşı mübarizə mövzularında müzakirələrdə maraqlı təkliflər səsləndi. Kəlbəcər rayon Rəssamlıq məktəbinin gənc rəssamlarının gender əsaslı zorakılığa həsr edilmiş rəsm işlərinin müsabiqəsi keçirilmişdir. 3 rəsm işi mükafatlandırılmışdır. Sözügedən tədbirlərin icrası gender əsaslı zorakılıqla mübarizədə həmrəylik nümayiş etdirməyi, zorakılığın qarşısını almaq üçün yeni yanaşmaların tətbiq edilməsini və cəmiyyətin bu mövzuya həssaslığının artırılmasını hədəfləyir.
