Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində yeni müjdələr verdi.
“Cənab Prezident ölkə iqtisadiyyatı, həm də müdafiə sənayesi ilə bağlı önəmli işlərin görüləcəyini bəyan etdi. Ölkə başçısı Qarabağda baş verən hadisələrdən xüsusi olaraq danışdı. Önəmli məqamlardan biri də işğaldan azad olmuş ərazilərə insanların köçürülməsi ilə bağlıdır. Dövlət başçısı qeyd etdi ki, Kərkicahan, Malıbəyli, Turşsunun bərpa olunaraq əhalinin ora köçürülməsi, həmçinin gələn ildən etibarən Xocalı və Xankəndi sakinlərinin də öz evlərinə qayıtması istiqamətində ciddi işlər gedir. Artıq əksər rayonlarımızda evlər tikilir və insanlar mərhələli şəkildə köçürülür. Quruculuq-bərpa işləri həyata keçirilir. 2024-cü ilin Azərbaycan üçün mühüm və önəmli olacağı Prezidentin çıxışında xüsusi olaraq vurğulandı. Ölkə başçısı vurğuladı ki, bundan başqa, bir neçə yaşayış məntəqəsi də keçmiş köçkünləri qəbul etməyə hazır olacaq.
Cənab Prezidentin xalqa müraciəti, təbriki çox konseptual və əhatəli idi. Dövlət başçısı xalqı təbrik etməklə yanaşı, həm də mühüm mesajlar verdi: Ölkə rəhbəri öz çıxışında insanları maraqlandıran bir çox məqama aydınlıq gətirdi. 2024-cü il həm Böyük Qayıdış, həm inkişaf, həm də tərəqqi ili olacaq”.
Dövlət başçımız xaricdə yaşayan azərbaycanlılar haqqında da fikirlərini bildirərək onların maraq və mənafeyinin qorunmasının Azərbaycan dövlətinin başlıca vəzifələrindən hesab etdiyini qeyd etdi. Dünyanın müxtəlif ölkələrində milyonlarla soydaşımız yaşayır, işləyir, fəaliyyət göstərir. Hazırda cənab prezidentin ortaya qoyduğu siyasi iradə ölkəmizin hüdudlarından kənarda yaşayan soydaşlarımızda milli ruhun yüksəlməsinə, onların vahid ideologiya və məqsədlər ətrafında daha sıx səfərbər olmalarına böyük töhfə verir.
Azərbaycan diaspor təşkilatlarının fəaliyyətinə dəstək vermək, onların maddi-texniki bazasını möhkəmləndirmək, milli-mənəvi dəyərlərimizi inkişaf etdirmək və dünyada daha geniş tanıtmaq, xaricdə yaşayan azərbaycanlıların sosial müdafiəsini gücləndirmək və bu sahəyə dövlət dəstəyinin ünvanlılığını təmin etmək məqsədilə Prezident İlham Əliyevin 2018-ci 6 iyul tarixli Fərmanı ilə Diasporla İş üzrə Dövlət Komitəsinin tabeliyində Azərbaycan Diasporuna Dəstək Fondu yaradıldı. Məhz buna görədir ki, 2023-cü il Azərbaycan tarixində bir çox mühüm hadisələrlə yadda qaldı. Prezident İlham Əliyevin həyata keçirdiyi prinsipial və qətiyyətli siyasət nəticəsində qələbəmiz, dövlətçiliyimiz və müstəqilliyimiz daha da möhkəmləndi. Ən əsası Azərbaycan öz suverenliyini bütün ərazilərində təmin etdi. Bu gün Azərbaycan bayrağı Xankəndi, Xocalı, Xocavənd və işğaldan azad olunmuş digər ərazilərimizdə qürurla dalğalanır.
Milli Məclisin deputatı Ceyhun Məmmədov
