Bu gün Şərqlə Qərb arasında strateji açar rolunu oynayan Azərbaycan həm də Türk dünyasının inteqrasiyasında və beynəlxalq münasibətlər sistemində yeni siyasi-iqtisadi güc mərkəzi kimi formalaşmasında müstəsna rol oynamaqdadır.
Bunu Ölkə.az-a açıqlamasında Milli Məclisin Gənclər və idman komitəsinin sədri Şahin İsmayılov Prezident İlham Əliyevin Türkmənistana səfərini və səfər çərçivəsində Azərbaycan-Özbəkistan-Türkmənistan liderləri arasında keçirilən üçtərəfli sammiti şərh edərkən deyib.
Komitə sədri bildirib ki, Azərbaycanın yaratdığı yeni geosiyasi reallıqdan sonra Avrasiya coğrafiyasında yeni əməkdaşlıq formatları ilə bağlı irəli sürdüyü təkliflər və təşəbbüslər istər region ölkələri, istərsə də dünyanın supergüc dövlətləri və beynəlxalq təşkilatları tərəfindən qəbul edilməkdədir:
“Azərbaycanın yaratdığı reallığın tələblərinə uyğun olaraq yürütdüyü xarici siyasətin prioritetlərindən biri də Türk dünyası ölkələri və Mərkəzi Asiya ölkələri ilə əlaqələrin ən yüksək səviyyəyə qaldırılmasıdır. Bu məqsədlə Azərbaycan Mərkəzi Asiya ölkələri ilə həm ikitərəfli, həm də çoxtərəfli formatlarda sıx əməkdaşlıq münasibətləri qurmaqdadır. Cənab Prezident İlham Əliyevin Türkmənistana səfəri də bu siyasətin bariz göstəricisidir. Son illərdə iki ölkə arasında əlaqələr sürətlə inkişaf etməkdədir”, – o qeyd edib.
Deputat əlavə edib ki, Türkmənistanla əlaqələrin inkişafı bir çox cəhətdən mühüm əhəmiyyət kəsb edir:
Türkmənistan türkdilli dövlətlərin daha sıx əməkdaşlıq münasibətlərinin qurulması, Türkdilli Dövlətlər Təşkilatının sırasının genişlənərək daha ciddi güc mərkəzi kimi formalaşması baxımından;
Azərbaycanın Mərkəzi Asiya bölgəsinə daha rahat çıxışını təmin etmək baxımından xüsusi əhəmiyyət daşıyır. Azərbaycan Türkmənistan üzərindən quru yolu ilə Tacikistan, Əfqanıstan və digər region ölkələrinə rahat çıxış əldə etmək imkanı qazanır;
İki ölkə arasında əməkdaşlığın genişlənməsi, heç şübhəsiz ki, bu gün Azərbaycan üçün mühüm əhəmiyyət kəsb edən Orta Dəhlizin rolunun daha da gücləndirilməsi baxımından önəmlidir;
Enerji sahəsində əməkdaşlıqların inkişaf etdirilməsi, gələcəkdə Türkmənistan qazının və yaşıl enerjinin Azərbaycan üzərindən Avropaya nəqli baxımından əhəmiyyətlidir;
Zirvə görüşləri, gənclər proqramları, iqtisadi forumlar türkdilli dövlətlər arasında birliyin və həmrəyliyin güclənməsinə xidmət edir;
Qarabağ və Şərqi Zəngəzurun bərpası baxımından;
Azərbaycanın yaratdığı reallıqların daha da möhkəmlənməsi baxımından müstəsna rol oynayır.
“Cənab Prezidentin Türkmənistan səfəri ikitərəfli əlaqələrlə yanaşı, çoxtərəfli əlaqələrin daha da inkişafına və Azərbaycanın qarşıya qoyduğu hədəflərə nail olunmasında müstəsna rol oynayacaq”, – deputat vurğulayıb.
Azərbaycan-Türkmənistan-Özbəkistan arasında keçirilən üçtərəfli sammitlə bağlı mövqeyini açıqlayan deputat bildirib ki, bu Zirvə görüşü bütövlükdə Mərkəzi Asiya–Azərbaycan və Türk dünyası ölkələri arasında daha sıx münasibətlərin qurulmasında yeni bir mərhələyə keçməsinə öz töhfəsini verəcək.
