Brüssel görüşü Azərbaycan Prezidentinin yürütdüyü xarici siyasi kursun və diplomatiyasının növbəti uğurudur.
Bunu Avropa.info-ya açıqlamasında Milli Məclisin deputatı Şahin İsmayılov deyib.
Onun sözlərinə görə, bu gün bütövlükdə Qərb və beynəlxalq aləm Azərbaycanın beynəlxalq aləmdə oynadığı rolu, o cümlədən Cənubi Qafqazda dayanıqlı sülhün, sabitliyin, həmçinin sıx əməkdaşlıq formatının yaranması istiqamətindəki qətiyyətli səylərini və irəli sürdüyü şərtləri, onun reallaşmasını dəstəkləyir.
“Beynəlxalq aləm yaxşı bilir və anlayır ki, ancaq Azərbaycanın irəli sürdüyü şərtlər əsasında bölgədə dayanıqlı sülhün yaranması mümkündür”, – o qeyd edib.
Brüssel görüşünün əhəmiyyətinə toxunan Ş.İsmayılov bildirib ki, Brüssel görüşü Vaşinqton və Kişinyov görüşlərinin ruhuna uyğun olaraq, ən qısa zamanda ədalətli, beynəlxalq hüququn norma və prinsiplərinə əsaslanaraq sülhün əldə edilməsi istiqamətində keçib:
“Danışıqlar Azərbaycanın təklif etdiyi sülh gündəliyinə uyğun şəkildə keçib. Ən ciddi məqam isə ondan ibarətdir ki, artıq danışıqlar masasında soydaşlarımızın Qərbi Zəngəzura qayıdışı məsələsinin də olmasıdır. Əgər indiyədək Azərbaycanın sülhlə bağlı beş əsas təklifi müzakirə edilirdisə, artıq bura Qərbi Azərbaycan torpaqlarından didərgin düşən soydaşlarımızın öz yurdlarına dönüşü məsələsi də daxildir. Beynəlxalq müstəvidə problemin qaldırılması, onun qəbul edilməsi deməkdir. Problem beynəlxalq aləm tərəfindən qəbul edildiyindən danışıqlar masasında vacib məsələ kimi müzakirə predmetidir. Bu, bizə nəinki İrəvanla sülh sazişinin imzalanmasına, eyni zamanda Qərbi Azərbaycanın Zəngəzur, Basarkeçər, Dərələyəz, Göyçə və digər ərazilərindən qaçqın düşən soydaşlarımızın dönüşünə əminlik yaradır. Bu, artıq cənab Prezidentin yürütdüyü xarici siyasətin uğurudur. Aparılan danışıqlar tez bir zamanda sülhün əldə olunmasına əminlik yaradır. Bunun üçün İrəvan siyasi iradə nümayiş etdirib, destruktivlikdən əl çəkib bəyan etdiklərini rəsmi şəkildə imzalanmış sənədlərlə sübuta yetirməlidir”.
Bununla belə, deputat hesab edir ki, bəzi ölkələr, xüsusən də Rusiya, İran və Fransa bölgədə sülhün əldə olunmasında maraqlı olmadığından sülh prosesinə maneçilik yartamağa cəhd edirlər:
“Brüssel görüşündən sonra rəsmi Moskvanın sərgilədiyi mövqe Rusiyanın 10 noyabr 2020-ci ildə üçtərəfli birgə bəyanat zamanı üzərinə götürdüyü öhdəliyin ruhuna uyğun deyil. Üçtərəfli bəyanatın tələblərinə əsasən Rusiya tərəflər arasında ən qısa zamanda etimad mühitinin yaradılması və sülhün imzalanması istiqamətində addımlar atmalı idi. Üçtərəfli bəyanatın 4-cü və 9-cu maddələri birbaşa Rusiyanın üzərinə öhdəliklər qoyur. Bəyanatın 4-cü bəndinin tələblərinə uyğun olaraq Rusiya hərbi kontingentinin erməni silahlı qüvvələrinin çıxarılması ilə paralel şəkildə yerləşdirilməsi nəzərdə tutulurdu. Amma çox təəssüflər olsun ki, biz ötən 3 ilə yaxın müddətdə bunun şahidi olmadıq. Rus hərbi kontingentinin müvəqqəti nəzarətində olan ərazilərdə hələ də qanunsuz erməni hərbi biləşmələri və terrorçu qüvvələr mövcuddur. Onlar tərksilah edilməyib. Rus hərbçiləri onları tərksilah etmək əvəzinə ötən müddətdə onlarla sıx əməkdaşlıq edərək onların hərtərfli təchizatına yardım edib.
Digər tərəfdən, bəyanatın 9-cu bəndinin tələblərinə uyğun olaraq bölgədəki bütün iqtisadi və nəqliyyat əlaqələri bərpa edilməli, Azərbaycanın Naxçıvan Muxtar Respublikası ilə nəqliyyat dəhlizinin açılmasına nail olunmalı idi. Bu məsələ də indiyədək öz həllini tapmayıb. Rusiya bu təəssüfdoğurucu mövqedən uzaqlaşıb fəaliyyətini bölgədə ədalətli sülhün yaranması istiqamətində yönəltsə daha yaxşı olar. Bundan həm də özü qazanacaq və bölgədə maraqlarını təmin edə biləcək”.
