Azərbaycan-Ermənistan dövlətlərarası münasibətlərində yeni mərhələnin başlanğıcı məhz avqustun 8-də ABŞ-da qoyuldu. Cənubi Qafqaz regionuna sülh, sabitlik və firavanlıq gətirəcək bu tarixi hadisə bölgədə yeni əməkdaşlıq platformalarının formalaşması baxımından da mühüm əhəmiyyət kəsb edir.
Bu fikirləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov söyləyib.
“Vətən müharibəsində parlaq Zəfərimizdən dərhal sonra Azərbaycan qarşılıqlı hörmət və beynəlxalq hüququn prinsipləri əsasında sülh təşəbbüsü ilə çıxış etdi. Prezident İlham Əliyevin Səudiyyə Ərəbistanının “Əl-Ərəbiyyə” telekanalına müsahibəsində qeyd etdiyi kimi, avqustun 8-də Vaşinqtonda paraflanmış sənəd Ermənistan–Azərbaycan münasibətlərinin dövlətlərarası çərçivədə necə qurulmalı olduğu barədə Azərbaycanın baxışına əsaslanır, regionda davamlı və dayanıqlı sülhün təmin olunması istiqamətində olduqca mühüm hadisədir. Belə ki, Azərbaycanın təşəbbüsü ilə Sazişin paraflanması ölkəmizin sülhə və əməkdaşlığa əsaslanan mövqeyinin təzahürüdür”, – deyə komitə sədri qeyd edib.
Azərbaycanın beynəlxalq hüququn aliliyinə, dövlətlərin daxili işlərinə qarışmama və çoxtərəfli əməkdaşlıq prinsiplərinə əsaslanan siyasət yürütdüyünü söyləyən Şahin İsmayılov diqqətə çatdırıb ki, Ermənistanın Azərbaycana hərbi təcavüzü və işğal faktının 30 il davam etməsi bölgənin potensialından tam istifadəyə ciddi maneə olub. Əlbəttə, Azərbaycan tərəfdaşları ilə birgə qlobal əhəmiyyətli enerji və nəqliyyat layihələrini reallaşdıraraq geniş coğrafiyada əməkdaşlıq üçün böyük imkanlar yaradıb. Bu gün Azərbaycan Avropanın enerji təhlükəsizliyinə əhəmiyyətli töhfələr verir. Ölkəmiz beynəlxalq miqyasda etibarlı enerji tərəfdaşına çevrilib. Cari il avqustun əvvəlində Azərbaycan qazının Suriyaya nəqlinə başlanılıb. Beləliklə, Azərbaycan qazı artıq Yaxın Şərq regionuna nəql olunur.
“Dövlətimizin başçısının müsahibəsində qeyd etdiyi kimi yeni yaradılacaq Zəngəzur dəhlizi qitələri birləşdirən vacib nəqliyyat əlaqəsi olacaq. Azərbaycanın əsas hissəsi ilə Naxçıvan arasında birbaşa bağlantının qurulması ölkəmiz üçün mühüm əhəmiyyətə malikdir. Bununla yanaşı, bu marşrut regionda qarşılıqlı faydalı əməkdaşlıq üçün olduqca səmərəli imkanlar təqdim edəcək. Bütün qonşu ölkələr bu imkandan faydalanacaq”,- deyən Şahin İsmayılov bildirib ki, güclü mövqelərə malik tranzit ölkəyə çevrilmək ölkəmizin əsas hədəflərindəndir və ötən illər ərzində bu istiqamətdə olduqca zəruri addımlar atılıb. Bu baxımdan TRIPP marşrutu regiona olan beynəlxalq marağı daha da artıracaq, həmçinin yeni investisiyaların cəlb olunmasına mühüm şərait yaradacaq.
Mövcud geosiyasi proseslər fonunda Azərbaycanın təşəbbüsləri, balanslaşdırılmış xarici siyasəti və konstruktiv mövqeyinin beynəlxalq ictimaiyyət üçün xüsusi əhəmiyyət daşıdığını bildirən Şahin İsmayılov Prezident İlham Əliyevin müdrik rəhbərliyi ilə Azərbaycanın bu gün beynəlxalq münasibətlər sisteminin aparıcı aktorlarından biri kimi sabitləşdirici roluna böyük ehtiyac duyulduğunu diqqətə çatdırıb. Bu xüsusda, İsrail və Suriya arasında normallaşma prosesində Azərbaycanın vasitəçiliyi xüsusi əhəmiyyətə malikdir.
