Məlum olduğu kimi, Prezident İlham Əliyevin imzaladığı sərəncama əsasən hər il oktyabrın 4-ü ölkəmizdə Cəbrayıl şəhəri Günü kimi qeyd olunur. Bu gün münasibətilə Oktyabrın 3-ü və 4-də Prezident İlham Əliyev Cəbrayıla səfər edərək bir sıra yeni müəssisələrin açılışında və təməlqoyma mərasimində iştirak etdi. Cəbrayıl şəhər sakinlərinə evlərinin açarlarını təqdim etdi. Beləliklə Cəbrayıllıların da yurd həsrətinə son qoyuldu. Artıq Cəbrayılda da həyat öz axarına qayıtdı.
Eyni zamanda Prezident İlham Əliyev Cəbrayıl şəhərində 960 nəfərlik məktəbin açılışında da iştirak etdi. Bu ildən artıq Cəbrayıllı şagirdlər doğma yurdda təhsil alacaqlar. Tezliklə Cəbrayılın təhsil ənənələri də bərpa olunacaq.
Azərbaycan bütün bu uğurlara Prezident İlham Əliyevin qətiyyəti və prinsipial siyasəti nəticəsində nail olaraq bu gün bölgədə yeni reallıq yaradıb.
Prezident İlham Əliyev rayon sakinləri ilə görüş zamanı bir sıra mühüm mesajlar da verdi. Artıq bir neçə dəfədir ermənilər tərəfindən vəhşicəsinə dağıdılan Cəbrayıldan Prezident İlham Əliyev bu cür mesajları verir. Bu dağıntılar Azərbaycan xalqının məruz qaldığı vəhşiliyi açıq-aydın göstərir.
Təəssüf ki, bu gün Azərbaycanın yaratdığı yeni reallığı qəbul etmək istəməyən dövlətlər, o cümlədən Amerika Birləşmiş Ştatlarında ölkəmizə qarşı sanksiya tətbiq etmək barədə müzakirələr aparılır. Onlar bir tərəfdən bizimlə dostluq etmək istədiklərini bildirir, digər tərəfdən Ermənistanı silahlandırır, bölgədə gərginlik yaradırlar.
Reallıq isə belədir. Sanksiya tətbiq edilməli olan ölkə məhz Ermənistandır. İşğalçını, təcavüzkarı kənara qoyub haqlını ittiham etmək ən azından ədalətsizlikdir. Biz bu ədalətsizliklə heç zaman barışmayacağıq.
Heç şübhəsiz ki, Ermənistana bu cür münasibət və dəstək onları yeni müharibələrə və cinayətlərə sövq edir. Azərbaycan dəfələrlə bu cür cəhdlərin və təxribatların şahidi olub.
Sonda onu da qeyd edim ki, Paşinyanın Cəbrayıla yol çəkmək arzusu ürəyində qaldığı kimi Qərb dövlətlərinin ölkəmizə qarşı apardıqları çirki kampaniyalar da nəticəsiz qalacaq. Azərbaycan qarşısına qoyduğu bütün hədəf və məqsədlərə nail olacaq.
Milli Məclisin deputatı Ceyhun Məmmədov
