Ölkəmizdə beynəlxalq idman yarışlarının keçirilməsi böyük qürur və sevinc hissi doğurur. Formula 1 kimi nüfuzlu bir tədbir Azərbaycanın dünyada tanınmasına, ölkəmizə turist axınının artmasına, yerli sahibkarlığın inkişafına və iqtisadi canlanmaya mühüm töhfələr verir. Bundan əlavə, belə tədbirlər dövlətimizin idman diplomatiyasında mühüm rol oynayır və Azərbaycanı etibarlı tərəfdaş, qlobal arenada güclü ev sahibi kimi göstərir.
Ancaq digər tərəfdən, şəhərin gündəlik həyatında yaşayan insanlar da nəzərə alınmalıdır. Paytaxt Bakının yükü getdikcə artır. Nəqliyyat sıxlığı, gündəlik tıxaclar və əlavə yüklənmə sakinlərin həyatını çətinləşdirir. Bu səbəbdən də ölkəmizdə yalnız Bakının deyil, digər şəhərlərin də inkişafı vacibdir.
Gəncə, Sumqayıt və gələcəkdə azad edilmiş torpaqlarımızda Xankəndi kimi şəhərlərin inkişaf etdirilməsi həm regionların bərabər yüksəlişi, həm də beynəlxalq tədbirlərin bölgələrə yönləndirilməsi baxımından çox əhəmiyyətlidir. Bu şəhərlərdə müasir infrastrukturun qurulması, yolların, hotellərin, nəqliyyat sistemlərinin təkmilləşdirilməsi gələcəkdə orada da böyük idman və mədəni tədbirlərin keçirilməsinə imkan yaradacaq. Bu, həm yerli iqtisadiyyata əlavə stimul verər, həm də Bakı üzərindəki yükü azaldar.
Beləliklə, bir tərəfdən ölkəmizin beynəlxalq miqyasda tanınması, digər tərəfdən isə şəhər sakinlərinin rahatlığı arasında balansın qorunması zəruridir. Məncə, Azərbaycanın hər bir şəhəri inkişaf etdikcə ölkəmiz daha da güclənəcək və beynəlxalq tədbirlər daha geniş miqyasda keçiriləcək.
Milli Cəbhə Partiyası sədrinin müavini Ehtiram Mehdiyev
