“Badminton Məktəbi” qrant layihəsi uğurla başa çatıb. Layihə 312 nömrəli tam orta məktəbin coğrafiya müəllimi Fidan Axundova tərəfindən icra olunub.
Layihənin əsas məqsədi məktəblilər arasında badminton idman növünə marağı artırmaq, onların fiziki fəallığını gücləndirmək, sağlam həyat tərzini təşviq etmək və idman vasitəsilə sosial bacarıqlarının inkişafına dəstək olmaq olub.
Layihə çərçivəsində iki məktəbdə 7–8-ci sinif şagirdlərindən ibarət qruplar formalaşdırılıb və ümumilikdə 30 nəfər məktəbli fəaliyyətlərə cəlb olunub. İştirakçılar üçün badminton üzrə 16 nəzəri və praktiki təlim təşkil edilib. Təlimlər Kərim Musayevin rəhbərliyi ilə keçirilərək şagirdlərin badmintonun əsas qaydaları, texnikaları və oyun bacarıqları üzrə biliklərinin artırılmasına yönəlib.
Təlimlər zamanı iştirakçılar fiziki hazırlıq, çeviklik, koordinasiya və sürətli qərarvermə bacarıqlarını inkişaf etdiriblər. Eyni zamanda fəaliyyətlər şagirdlər arasında komanda ruhunun möhkəmlənməsinə, qarşılıqlı əməkdaşlığın güclənməsinə və sağlam rəqabət mühitinin formalaşmasına töhfə verib.
Layihənin yekun mərhələsində hər iki məktəbdə badminton turnirləri təşkil olunub. Turnirlər zamanı şagirdlər təlimlər ərzində əldə etdikləri bilik və bacarıqları nümayiş etdirərək yarışlarda iştirak ediblər. Bağlanış mərasimində layihənin nəticələri təqdim olunub, iştirakçıların uğurları qeyd edilib və layihədə iştirak edən şagirdlərə sertifikatlar təqdim olunub.
“Təhsildə İnkişaf və İnnovasiyalar üzrə IX Qrant Müsabiqəsi” çərçivəsində keçirilən layihənin nəticəsi olaraq məktəblilər arasında badminton idman növünə maraq artıb, iştirakçıların fiziki fəallığı və idman bacarıqları inkişaf edib. Eyni zamanda layihə sağlam həyat tərzinin təşviqinə və məktəblərdə idman mədəniyyətinin formalaşmasına mühüm töhfə verib.
Rəylər 3