Bu gün Azərbaycanda mövcud olan investisiya imkanları ölkəmizdə ötən illər ərzində həyata keçirilən ardıcıl iqtisadi siyasətin, yaradılmış əlverişli biznes mühitinin və müasir infrastrukturun məntiqi nəticəsidir. İqtisadiyyatın şaxələndirilməsi, özəl sektorun inkişafının təşviqi, xarici sərmayələrin qorunması və yeni investisiya istiqamətlərinin müəyyənləşdirilməsi Azərbaycanı beynəlxalq investorlar üçün etibarlı tərəfdaşa çevirib. İkinci Azərbaycan Beynəlxalq İnvestisiya Forumunda dünyanın aparıcı şirkətlərinin geniş təmsil olunması və mühüm razılaşmaların əldə edilməsi də məhz bunun təsdiqidir.
Bunu AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov bildirib.
Şahin İsmayılov bildirib ki, Prezident İlham Əliyevin Forum çərçivəsində keçirilən tədbirdə qeyd etdiyi kimi, əlverişli investisiya mühiti sayəsində ölkəmiz son 20 ildə 350 milyard ABŞ dollarından çox investisiya cəlb edib. Bunun təxminən yarısı birbaşa xarici investisiyalardır. Bu göstərici ilk növbədə beynəlxalq biznes dairələrinin Azərbaycan iqtisadiyyatına uzunmüddətli etimadının ifadəsidir. Xüsusilə iqtisadiyyatın müxtəlif sahələrində fəaliyyət göstərən aparıcı beynəlxalq şirkətlərin Azərbaycanı etibarlı tərəfdaş kimi qəbul etməsi ölkədə formalaşmış investisiya mühitinin əsas üstünlüklərindən biridir.
Komitə sədri qeyd edib ki, investisiya cəlbediciliyini şərtləndirən başlıca amillərdən biri siyasi və iqtisadi sabitlikdir. Uzunmüddətli investisiya qərarları yalnız iqtisadi potensialla deyil, həm də proqnozlaşdırılabilən siyasi mühit, maliyyə dayanıqlılığı və tərəfdaşların öz öhdəliklərinə sadiqliyi ilə birbaşa bağlıdır. Azərbaycanın güclü maliyyə imkanları, aşağı xarici borcu, sabit milli valyutası və müsbət ticarət balansı xarici sərmayələr üçün əlavə təminat yaradır. Ölkəmizin valyuta ehtiyatları xarici borcu təxminən 20 dəfə üstələyir.
Xalqımızın Ümummilli Lideri Heydər Əliyevin müəyyənləşdirdiyi enerji strategiyasının dövlətimizin başçısının müdrik rəhbərliyi ilə müasir dövrün çağırışlarına uyğunlaşdırılmaqla davam etdirildiyini söyləyən Şahin İsmayılov deyib: “Təbii ki, neft və qaz resurslarının iqtisadiyyatımızda rolu bu gün də çox böyükdür. Amma bununla yanaşı, bərpaolunan enerji istehsalı və ixracı, elektrik enerjisinin ötürülməsi və enerji saxlanc sistemlərinin yaradılması yeni investisiya istiqamətləri kimi ön plana çıxır. Xəzər dənizinin Azərbaycan sektorunda 157 giqavat həcmində külək enerjisi potensialının mövcudluğu, quruda Günəş və külək elektrik stansiyalarının yaradılması ölkəmizin enerji xəritəsini daha da şaxələndirir”.
Azərbaycanın investisiya potensialının digər mühüm istiqamətinin nəqliyyat və logistika sektoru olduğunu söyləyən komitə sədri bildirib ki, ölkəmizin coğrafi mövqeyi ötən illər ərzində düzgün qiymətləndirilib və müasir infrastruktur yaradılıb. Bütün görülən işlər ölkəmizi Şərq-Qərb və Şimal-Cənub marşrutlarının kəsişdiyi mühüm nəqliyyat qovşağına çevirib. Prezident İlham Əliyevin də vurğuladığı kimi, Azərbaycan dəmir yollarına, dəniz limanlarına, hava yükdaşımalarına və avtomobil yollarına böyük həcmdə investisiya yatırıb. Bu infrastrukturun inkişafı yalnız Azərbaycanın tranzit imkanlarını artırmır, həm də Avropa ilə Asiya arasında alternativ və etibarlı təchizat zəncirlərinin formalaşdırılmasına xidmət edir.
Onun sözlərinə görə, İkinci Azərbaycan Beynəlxalq İnvestisiya Forumu çərçivəsində mühüm razılaşmalar əldə olunub. Yeni investisiyaların cəlb edilməsi iqtisadiyyatın şaxələndirilməsinə, müasir istehsal sahələrinin yaradılmasına və ölkəmizin regional iqtisadi mövqeyinin daha da güclənməsinə xidmət edəcək.
