Regionda sabitliyin, təhlükəsizliyin və qarşılıqlı faydalı əməkdaşlığın qurulmasına daim böyük önəm verən Azərbaycanın uğurlu xarici siyasət kursu, qlobal əhəmiyyətli təşəbbüsləri bölgənin inkişafına mühüm töhfə verir. Reallaşdırılan uğurlu enerji və nəqliyyat layihələri regionun dayanıqlı tərəqqisində müstəsna rol oynamaqla yanaşı, böyük perspektiv vəd edir.
Modern.az xəbər verir ki, bu fikirlər Milli Məclisin Gənclər və idman komitəsinin sədri Şahin İsmayılov açıqlamasında yer alıb.
Şahin İsmayılov qeyd edib ki, qlobal gərginliklər fonunda Prezident İlham Əliyevin rəhbərliyi ilə Azərbaycan bütün tərəfdaşları, o cümlədən region ölkələri ilə daha sıx əməkdaşlığı təşviq edən siyasi dialoq aparır. Dövlətimizin başçısının Çinə uğurlu dövlət səfəri, əldə olunan mühüm razılaşmalar, iki ölkə arasında hərtərəfli strateji tərəfdaşlığın qurulması nəinki Azərbaycan-Çin münasibətlərinin, bütövlükdə regionun gələcək inkişafına töhfə verəcək. Eyni zamanda, bir neçə gün öncə İran Prezidenti Məsud Pezeşkianın Azərbaycana səfəri iki qonşu ölkə arasında əlaqələrin inkişafı baxımından müstəsna əhəmiyyət kəsb edir. Bu xüsusda, təbii ki, iqtisadi sahədə səmərəli əməkdaşlıq perspektivlərini qeyd edə bilərik.
“Prezident İlham Əliyevin İran Prezidenti ilə birgə mətbuata bəyanatında qeyd etdiyi kimi, səfər çərçivəsində üçtərəfli əməkdaşlıq layihələri, o cümlədən Şimal-Cənub nəqliyyat dəhlizi ilə bağlı geniş müzakirə aparılıb. Bu layihə iştirak edən bütün ölkələrə çox böyük səmərə gətirəcək, regional əməkdaşlığa böyük fayda verəcək. Qlobal çağırışlar fonunda dövlətimizin başçısının rəhbərliyi ilə Azərbaycanın həyata keçirdiyi uğurlu diplomatiya regional əməkdaşlıq imkanlarını genişləndirir”, – deyə komitə sədri vurğulayıb.
Milli Məclisin komitə sədri, həmçinin İrandan gələn 120-dən çox iş adamının iştirakı ilə keçirilən Azərbaycan-İran biznes-forumunun iki ölkə arasında iqtisadi əməkdaşlığa töhfə verəcəyini söyləyib. Ölkəmizdə güclü iqtisadi dayaqların formalaşdırılması, makroiqtisadi və maliyyə sabitliyi təmin olunub, əlverişli investisiya mühiti formalaşdırılıb. Bu, təbii ki, iranlı iş adamları üçün də cəlbedicidir.
Tarixi köklərə, mədəni və dini bağlara əsaslanan Azərbaycan-İran əlaqələrinin bu gün inkişafın yeni mərhələsinə qədəm qoyduğunu söyləyən komitə sədri bildirib ki, İslam mədəniyyətinin zəngin irsini paylaşan xalqlarımız arasında humanitar əlaqələrin daha da inkişafı məsələləri də diqqət mərkəzindədir. Ölkə başçısı bəyanatında humanitar, mədəniyyət sahələrində ənənəvi dostluq əlaqələrinin davam etdirilməsi üçün konkret göstərişlər verildiyini bildirib, yaxın gələcəkdə qarşılıqlı mədəniyyət günlərinin keçiriləcəyini diqqətə çatdırıb. “Əlbəttə, ortaq mədəni dəyərlərlə bir-birinə bağlı olan xalqlarımız arasında bu cür münasibətlərin təşviqi ölkələrin qarşılıqlı əməkdaşlığının inkişafına töhfə verəcək”, – deyə komitə sədri vurğulayıb.
