Bildiyimiz kimi martın 17-də NATO-nun baş katibi Yens Stoltenberq Azərbaycana səfərə gəlib. Bu onun ölkəmizə ilk səfəridir.
Stoltenberq Prezident İlham Əliyevlə və müdafiə naziri Zakir Həsənovla görüşərək müzakirələr aparıb.
NATO-nun baş katibinin ölkəmizə səfəri xüsusi önəm daşıyır. İnanırıq ki, Stoltenberqin bu səfəri NATO-Azərbaycan əməkdaşlığının inkişafına müsbət təsir göstərəcək. Hesab edirəm ki, bu həm də, Azərbaycanın dünyada artan nüfuzunun göstəricisidir:
Eyni zamanda hazırda Azərbaycan Qərbin enerji təhlükəsizliyində çox mühüm rol oynayan bir dövlətə çevrilib. Səfər Azərbaycan-NATO əlaqələrinin inkişafı baxımından xüsusi əhəmiyyət daşıyır. Azərbaycan öz ordusunu NATO standartlarına uyğun qurur. Düzdür, Azərbaycanın hələ ki, NATO-ya üzv olmaq fikri yoxdur. Ancaq biz bu standartları öz ordumuzda tətbiq etdik. Bu səfərdə məqsəd Azərbaycanla əlaqələrin gücləndirilməsidir. Əslində, Azərbaycan – NATO əlaqələri uzun illərdir sürətlə inkişaf edir. Azərbaycan Əfqanıstanda, Kosovoda sülhməramlı missiyanın tərkibində dəfələrlə iştirak edib. Qeyd etdiyimiz kimi, Azərbaycanın Qərbin enerji təhlükəsizliyində oynadığı rol da NATO tərəfindən yüksək formada qiymətləndirilib. Görüşdə cənab prezident çox mühüm məsələlərə toxundu. Ermənistanla Azərbaycanın heç zaman olmadığı qədər sülhə yaxın olmasını qeyd etdi. Hesab edirəm ki, Stoltenberqin də verdiyi açıqlamalar Azərbaycanın mövqeyinin və yaratdığı reallığın bir daha qəbul olunduğunu göstərir. Azərbaycanın qələbəsinin möhkəmləndirilməsi baxımından bu səfər önəmlidir. Bütün hallarda biz NATO ilə əlaqələrimizi gücləndirməliyik. Çünki bu, Azərbaycanın həm də hazırda götürdüyü istiqamətə uyğun bir yanaşmadır və növbəti illərdə biz bu əlaqələrin daha da inkişaf etdiyinin şahidi olacağıq.
Azərbaycansız Cənubi Qafqazda heç bir problemin həlli mümkün deyildir. Ölkələr və xalqlar arasında sülhün və əməkdaşlığın qurulmasında Azərbaycan önəmli ölkədir. Bu səfər göstərdi ki, Azərbaycanın bundan sonra da mövqeləri daha da möhkəmlənəcək, nüfuzu artacaq.
Milli Məclisin deputatı Ceyhun Məmmədov
