Qalib və qüdrətli Azərbaycan bu gün dünyada güclü iqtisadi dayaqlara, qüdrətli orduya, möhkəm beynəlxalq mövqeyə malik ölkə kimi böyük nüfuz qazanıb. Azərbaycanın təşəbbüsü ilə icra olunan layihələr regional və qlobal müstəvidə enerji təhlükəsizliyinin təmin olunmasına mühüm töhfələr verir. Bütün bunlarla yanaşı, müasir Azərbaycan beynəlxalq gündəlikdə duran vacib məsələlərin müzakirə olunduğu önəmli platformaların müəllifidir. Beynəlxalq ictimaiyyət də Azərbaycana yüksək hörmət və etimad göstərir, ölkəmizi etibarlı tərəfdaş kimi qəbul edir.
Bu fikirləri AZƏRTAC-a müsahibəsində Milli Məclisin Gənclər və idman komitəsinin sədri Şahin İsmayılov deyib. O bildirib ki, Azərbaycan öz müstəqil xarici siyasəti ilə dünya dövlətləri, mühüm beynəlxalq təsisatlarla sıx əməkdaşlıq əlaqələri qurub: “Azərbaycan 13-cü dəfədir ki, dünyanı düşündürən məsələlərin müzakirəsi üçün mühüm rol oynayan Qlobal Bakı Forumuna ev sahibliyi edir. Prezident İlham Əliyevin himayəsi altında təşkil olunan Foruma diqqət ildən-ilə daha da artır. Dövlət və hökumət başçıları, tanınmış siyasətçilər, elm adamları, ekspertlərin qatıldığı Forum qlobal sistemin üzləşdiyi çağırışlara dair müzakirələrin aparılması, fikir ayrılıqlarının siyasi dialoqlar vasitəsilə aradan qaldırılmasını, sabit, qarşılıqlı hörmətə əsaslanan nizamın formalaşmasını təşviq edir”.
Şahin İsmayılov Azərbaycan dövlətinin işğal altındakı ərazilərini güc vasitəsilə azad edib, siyasi yollarla sülhə nail olduğunu qeyd edib: “Azərbaycan işğal olunmuş əraziləri güc vasitəsilə azad etdi və siyasi yollarla sülhə nail oldu. Ölkəmiz öz gücü hesabına təxminən 30 il davam edən ədalətsizliyə son qoydu, BMT Təhlükəsizlik Şurasının qərarlarını icra etdi. Bu gün ölkəmiz öz gücü ilə tarixi torpaqlarını bərpa edir, böyük quruculuq işlərini həyata keçirir, vətəndaşlarının doğma torpaqlarına təhlükəsiz şəraitdə qayıdışını təmin edir. Eyni zamanda, Azərbaycan regionda sülh və sabitliyin bərqərar olmasına nail oldu. İşğala, etnik təmizləməyə və soyqırımına məruz qalmış, suverenliyini, ərazi bütövlüyünü və ləyaqətini güc tətbiqi ilə bərpa etmiş, daha sonra isə o zaman məğlub olmuş düşmənə sülh təklif etmiş ölkə olmağımız beynəlxalq ictimaiyyətlə paylaşa biləcəyimiz nadir təcrübədir.
Sülh gündəliyinin təşviq edilməsi və iqtisadi əməkdaşlıq imkanlarının yaradılması regionda uzunmüddətli sabitliyin təmin olunmasına xidmət edir. Ölkəmizin təqdim etdiyi əməkdaşlıq platforması nəinki Cənubi Qafqaz regionunda, ümumilikdə daha geniş coğrafiyada tərəfdaşlıqların möhkəmlənməsinə, sabitliyin davamlı olmasına zəmin yaradır”.
