“Ermənistan Azərbaycanın şərtləri daxilində sülh sazişini imzalamağa məhkumdur və bunun başqa yolu yoxdur. Sadəcə, müxtəlif bəhanələrlə müəyyən xarici güclərin əlində alət olub, onların maraqları prizmasından sülh sazişindən yayınmaq nəticə etibarı ilə Ermənistanın xeyrinə olmayacaq”.
Bunu “Ölkə.Az”a açıqlamasında deputat Şahin İsmayılov Moskvada Azərbaycan, Rusiya və Ermənistan liderlərinin üçtərəfli formatda görüşünün yekunlarını şərh edərkən deyib.
Onun sözlərinə görə, Ermənistan sözdə sülhdən danışıb müxtəlif bəyanatlar versə də, danışıqlar masasında destruktivlik nümayiş etdirərək sülhün əldə olunmasından yayınır.
“Bu məqəsədlə də erməni tərəfi ən müxtəlif variantlara və bəhanələrə əl atır. Biz bunun mayın 25-də Moskvada üçtərəfli formatdan öncə Avrasiya İqtisadi İttifaqının Zirvə görüşündə də şahidi olduq. Onun sərgilədiyi təxribatçı mövqe danışıqlar prosesini pozmağa yönəlik təxribatçı bir hərəkət idi. Əgər Ermənistan tərəfi sülhün əldə olunmasında səmimi olsaydı, o zaman biz başqa bir mənzərənin şahidi olardıq. Amma bunun şahidi olmadıq. Bu isə o deməkdir ki, Ermənistan tərəfi hələ də sülhə hazır deyil. Gərginliyin davam etməsində maraqlıdır”, – o qeyd edib.
Deputat əlavə edib ki, Ermənistan və ermənilər sülhdən nə qədər yayınacaqsa, bundan daha çox itirən tərəf onlar olacaq: “Bu gün Ermənistanın siyasi rəhbərliyinin dünyada gedən geosiyasi prosesləri düzgün qiymətləndirib, buna uyğun siyasi iradə ortaya qoyub addım ata bilməməsi, həm Ermənistan dövlətçiliyinin, həm də erməni xalqının maraqlarına cavab vermir. Ermənistan bu gün gələcək inkişaf strategiyasını müəyyənləşdirib, buna uyğun addımlar atmaq əvəzinə hələ də bölgədə maraqlı güclərin əlində oyuncağa çevriliblər. Bu da həm bütövlükdə Cənubi Qafqaz bölgəsində dayanıqalı sülhün və əməkdaşlığına inkişafına mane olub, gərginliyin davam etməsinə, həm də elə Ermənistanın üzləşdiyi özünütəcrid məngənəsində boğulmasına xidmət edir. Amma Ermənistan sülhdən yayınmağa nə qədər cəhd etsə də, nəticəsi olmayacaq. Yekunda Azərbaycanın şərtləri daxilində sülh sazişini imzalamaq məcburiyyətində qalacaq. Bu sadəcə vaxt itkisidir ki, bundan da daha çox əziyyət çəkən elə ermənilərin özləridir”.
