“Prezident İlham Əliyevin IV Şuşa Qlobal Media Forumunda verdiyi mesajlar bu gün və gələcək üçün hesablanmış fundamental, ciddi hədəflərdir, son dərəcə təfsilatlı, aydın şəkildə ifadə olunmuş “yol xəritəsi”dir və nəhayət: Azərbaycanın günbəgün artan nüfuzunun, güclənən beynəlxalq mövqeyinin bariz nümunəsi və təntənəsidir.” – 7NEWS.AZ xəbər verir ki, bu fikirləri Demokratik Maarifçilik Partiyasının sədri, Milli Məclisin deputatı Elşən Musayev bildirib.
“Bəli. Şuşa artıq yalnız Zəfərin deyil, həm də qlobal dialoqun və həqiqətlərin səsləndiyi mühüm platformadır. Azərbaycanın praqmatik xarici siyasəti və milli maraqlara söykənən qətiyyətli mövqeyi ölkəmizin nüfuzunu daha da artırır.
IV Şuşa Qlobal Media Forumu bir daha göstərdi ki, Azərbaycan bu gün regionun əsas söz sahibi olan dövlətlərindən biridir. Eyni zamanda cənab Prezidentin səsləndirdiyi fikirlər ölkəmizin enerji təhlükəsizliyi, nəqliyyat dəhlizləri və regional əməkdaşlıq sahəsində nə qədər böyük və önəmli rola malik olduğunu bir daha, ən mükəmməl formada təsdiq etmiş oldu.
Şuşadan dünyaya verilən mesaj aydındır: Azərbaycan, milli maraqlarını qətiyyətlə qoruyan və etibarlı tərəfdaş kimi beynəlxalq çəkisini davamlı şəkildə gücləndirən bir dövlətdir. ” – deyə Partiya sədri fikirlərinə davam edib.
