Azərbaycan Respublikasının Prezidenti İlham Əliyev ilə İtaliya Respublikasının Nazirlər Şurasının sədri Ciorcia Meloni arasında 2026-cı il mayın 4-də Bakıda keçirilən görüş və mətbuata verilən bəyanatlar iki ölkə arasında strateji tərəfdaşlığın daha da dərinləşdiyini bir daha nümayiş etdirdi. Bu səfər Azərbaycan–İtaliya münasibətlərinin inkişafında mühüm mərhələ kimi qiymətləndirilir və əməkdaşlığın yeni istiqamətlərini müəyyənləşdirir.Prezident İlham Əliyev çıxışında qeyd etdi ki, İtaliya Azərbaycanın əsas ticarət tərəfdaşlarından biridir və uzun illərdir iki ölkə arasında iqtisadi əlaqələr uğurla inkişaf edir. Xüsusilə enerji sahəsində əməkdaşlıq strateji xarakter daşıyır. Azərbaycanın zəngin enerji resurslarının Avropaya çatdırılmasında İtaliya mühüm rol oynayır və bu istiqamətdə həyata keçirilən layihələr qarşılıqlı etimadın göstəricisidir. Dövlət başçısı vurğuladı ki, bu əməkdaşlıq təkcə iqtisadi deyil, həm də Avropanın enerji təhlükəsizliyi baxımından böyük əhəmiyyət kəsb edir.
Bəyanatda qeyri-neft sektorunda əməkdaşlığın genişləndirilməsinin vacibliyi də xüsusi qeyd olundu. Sənaye, kənd təsərrüfatı, yüksək texnologiyalar və yaşıl enerji sahələrində birgə layihələrin həyata keçirilməsi üçün geniş imkanların olduğu bildirildi. Prezident İlham Əliyev Azərbaycanın əlverişli investisiya mühiti və artan iqtisadi potensialı barədə məlumat verərək İtaliya şirkətlərini ölkəmizdə daha fəal iştirak etməyə dəvət etdi.Ciorcia Meloni isə öz növbəsində Azərbaycanın İtaliya üçün etibarlı tərəfdaş olduğunu vurğuladı. O qeyd etdi ki, iki ölkə arasında münasibətlər yalnız iqtisadi sahə ilə məhdudlaşmır, həm də siyasi, mədəni və humanitar sahələri əhatə edir. Meloni Azərbaycanın regionda oynadığı mühüm rolu yüksək qiymətləndirərək ölkələr arasında əməkdaşlığın daha da gücləndirilməsinin tərəfdarı olduğunu bildirdi.
İtaliya şirkətlərinin Azərbaycanda uğurlu fəaliyyətinin çox böyük tarixi var. İtaliya işgüzar dairələri Azərbaycanda böyük məbləğdə sərmayələr qoyur, həyata keçirilən bir sıra beynəlxalq əhəmiyyətli layihələrdə iştirak edirlər. Hazırda ölkəmizdə İtaliyanın 130-a yaxın şirkəti fəaliyyət göstərir. O cümlədən, işğaldan azad edilmiş Qarabağda və Şərqi Zəngəzurda İtaliya şirkətləri 23 layihə həyata keçirib və həyata keçirir. Xarici ölkələrin şirkətlərinə baxdıqda bu layihələrin icrasında İtaliya yenə qabaqcıl yerlərdədir.
Ulu Öndər Heydər Əliyevin ilk rəsmi səfəri zamanı 25 sentyabr 1997-ci il tarixində Romada Azərbaycan Respublikası Hökuməti və İtaliya Respublikası Hökuməti arasında mədəniyyət, elm və texnologiya sahəsində Birgə Bəyannamə, 1 iyun 2002-ci il tarixində isə Bakıda Azərbaycan Respublikası Hökuməti və İtaliya Respublikası Hökuməti arasında “Mədəniyyət, elm və texnologiya sahəsində əməkdaşlıq haqqında” saziş imzalanıb.
Münasibətlərin ən mühüm yeniliklərindən biri ötən il oktyabrın 1-də İtaliya-Azərbaycan Universitetinin yaradılması olub. Prezident İlham Əliyevin, birinci xanım Mehriban Əliyevanın və ölkəmizdə rəsmi səfərdə olan İtaliya Prezidenti Sercio Mattarellanın iştirakı ilə Bakıda Universitetin ilk tədris korpuslarının açılışı olub. Artıq 500-dən çox tələbə orada təhsil alır və gələcəkdə onlar həm peşəkar mütəxəssislər, həm də ki, Azərbaycanın İtaliyada və İtaliyanın Azərbaycanda təbii elçiləri olacaqlar.
Görüş zamanı regional və beynəlxalq məsələlər də müzakirə olundu. Prezident İlham Əliyev Cənubi Qafqazda sülh və sabitliyin təmin olunmasının Azərbaycanın əsas prioritetlərindən biri olduğunu diqqətə çatdırdı. O, regionda dayanıqlı sülhün bərqərar olması üçün Azərbaycanın konstruktiv təşəbbüslərlə çıxış etdiyini və bu istiqamətdə səylərini davam etdirdiyini qeyd etdi.Səfər çərçivəsində müxtəlif sahələri əhatə edən bir sıra sənədlərin imzalanması da iki ölkə arasında əməkdaşlığın hüquqi bazasının daha da möhkəmləndiyini göstərir. Bu sənədlər iqtisadi əlaqələrin genişləndirilməsi, investisiya mühitinin yaxşılaşdırılması və yeni layihələrin həyata keçirilməsi baxımından mühüm əhəmiyyət daşıyır.
Niyaməddin Əsgərov,
Yeni Azərbaycan Partiyası Beyləqan rayon təşkilatının sədr müavini
