“Texnologiyanın fiziki fəaliyyəti azaltdığı sürətlə dəyişən dünyada idmanın əhəmiyyəti daha çox artır. Uşaqları və gəncləri aktiv həyat tərzinə təşviq etmək daha sağlam, daha inamlı və daha möhkəm bir nəslə sərmayə qoymaqdır.” Milli Məclisin deputatı Könül Nurullayeva Milli Məclisdə 5 Mart – Bədən tərbiyəsi və idman günü ilə bağlı Gənclər və İdman Nazirliyi, Milli Olimpiya Komitəsi və idman federasiyaları ilə keçirilən görüşdə deyib. O bildirib ki, əlçatan infrastrukturun yaradılması, gənclərin idmana yönləndirilməsi ölkənin gələcəyinə qoyulan sərmayədir. Çünki sağlam, nizam-intizamlı və məqsədyönlü gənclik güclü dövlətin təməlidir.
“Son illər ölkəmizdə idman sahəsinə göstərilən dövlət qayğısı, regionlarda inşa olunan müasir idman komplekslərinin, ümumtəhsil və ali məktəblərdə yaradılan idman infrastrukturunun gənc nəslin sağlam mühitdə yetişməsinə xidmət edir” deyən K.Nurullayeva bildirib ki, Prezident İlham Əliyevin idmana göstərdiyi xüsusi diqqət və qayğı, Birinci vitse-prezident hörmətli Mehriban xanım Əliyevanın dəyərli təşəbbüsləri ölkəmizin dünyada idman dövləti kimi tanınmasına mühüm töhfə verir. Ölkəmizdə beynəlxalq əhəmiyyətli idman yarışlarının keçirilməsi, müasir stadionların və Olimpiya mərkəzlərinin tikilməsi Azərbaycanı dünyada idman dövləti kimi mövqeləndirib.
Milli vətənpərvərlik hissinin idmanın ayrılmaz tərkib hissəsi olduğunu bildirən K.Nurullayeva bildirib ki, “idman arenasında dalğalanan üçrəngli bayrağımız, səslənən Dövlət Himnimiz hər birimizin qəlbində eyni hissi oyadır. O an arenada bütöv bir xalqın ümidi, inamı və qüruru təmsil olunur. Qazanılan qələbə milyonların sevincinə çevrilir”.
Azərbaycanın son illər ev sahibliyi etdiyi mötəbər beynəlxalq idman tədbirlərinə uğurlu ev sahibliyinə də toxunan deputat bildirib ki, bu nailiyyətlər təkcə idman sahəsində deyil, eyni zamanda dövlətimizə göstərilən etimadın bariz ifadəsidir. Mükəmməl idman təcrübəsi olan bu tədbirlər gənclər arasında idmana marağı artırmaqla yanaşı, milli həmrəyliyimizi daha da möhkəmləndirməkdədir.
“Bu gün dövlətimizin idman siyasətinin mərkəzində məhz gənclər dayanır. Əsas hədəfimiz sağlam, savadlı, vətənpərvər, öz yolunu düzgün müəyyən edən, milli kimliyini qoruyub saxlayan, eyni zamanda qlobal düşüncə tərzinə sahib bir gənclik formalaşdırmaqdır” deyən. K.Nurullayeva diqqəti 44 günlük Vətən müharibəsinə, gənclərin ərazi bütövlüyü və suverenliyimizin bərpasında xüsusi roluna da toxundu. Qəhrəman oğullarımızın göstərdiyi şücaət, ərazi bütövlüyü və suverenliyimizin qorunması kimi ali dəyərlərin gələcək nəsillərə ötürülməsinin ən müqəddəs vəzifəmiz olduğunu qeyd etdi.
Deputat hesab edir ki, idmanın kütləviliyini təmin etmək üçün idman ixtisasları müasir elmi yanaşmalarla təkmilləşdirilməli, idman fiziologiyası, psixologiyası, qidalanma və idman menecmenti kimi sahələr daha da gücləndirilməlidir: “Çünki idmanın inkişafı yalnız fərdi təşəbbüslərlə deyil, kompleks tədbirlərlə mümkündür. Belə ki, təhsildən başlayan, sosial müdafiə ilə davam edən və peşəkar idarəetmə ilə möhkəmlənən sistem daha da inkişaf etdirilməlidir”.
Rəylər 15