“ABŞ vitse-prezidenti C.D. Vensin Bakıya səfəri və imzalanan Strateji Tərəfdaşlıq Xartiyası Azərbaycan–ABŞ münasibətlərində keyfiyyətcə yeni mərhələnin başlanğıcı kimi qiymətləndirilir. Bu səfər yalnız ikitərəfli münasibətlərin genişlənməsi deyil, həm də Cənubi Qafqazda təhlükəsizlik, sülh və əməkdaşlıq gündəliyinin güclənməsi baxımından mühüm geosiyasi mesajdır”.
Bunu ERAmedia-ya açıqlamasında Milli Məclisin deputatı Şahin İsmayılov deyib.
Onun fikrincə, yeni əməkdaşlıq mərhələsi Vaşinqton–Bakı xəttinin güclənməsi ilə nəticələnəcək:
“Strateji tərəfdaşlıq sənədi göstərir ki, ABŞ Azərbaycanı regionda etibarlı tərəfdaş və sabitliyin təminatçısı kimi qiymətləndirir. Bu əməkdaşlıq artıq təkcə enerji sahəsi ilə məhdudlaşmır; təhlükəsizlik, logistika, rəqəmsal inkişaf və iqtisadi inteqrasiya kimi geniş sahələri əhatə edir.
Bu yeni mərhələ Bakı–Vaşinqton münasibətlərini strateji səviyyəyə yüksəldir, Azərbaycanın beynəlxalq siyasi çəkisini artırır, regionun geosiyasi balansına təsir göstərir”.
O əlavə edib ki, Azərbaycanın regional rolunun güclənməsi Cənubi Qafqazın gələcək təhlükəsizlik modelinə birbaşa təsir edir.
“ABŞ-la əməkdaşlığın genişlənməsi regionda sabitliyin möhkəmlənməsinə xidmət edən mühüm amildir.
Bu proses sülh təşəbbüslərinin güclənməsini, iqtisadi əməkdaşlıq platformalarının genişlənməsini, təhlükəsizlik sisteminin möhkəmlənməsini sürətləndirir.
Xüsusilə Ermənistanla yekun sülhə nail olunması perspektivinin vurğulanması regionun uzunmüddətli sabitlik mərhələsinə keçid ehtimalını artırır. Bu, Cənubi Qafqazın qarşıdurma məkanından əməkdaşlıq məkanına çevrilməsi prosesinin sürətləndiyini göstərir.
Strateji tərəfdaşlıq Azərbaycanın beynəlxalq sistemdə rolunu genişləndirir. Ölkə artıq yalnız regional aktor kimi deyil, daha geniş coğrafiyada təsir imkanlarına malik orta güc kimi çıxış edir.
Bu statusun əsas elementləri çoxşaxəli tərəfdaşlıq siyasəti, regional təşəbbüskarlıq, iqtisadi və logistika qovşağı rolunun güclənməsi təşkil edir.
Nəticədə Azərbaycan Avrasiya məkanında əməkdaşlıq platformalarının əsas iştirakçılarından birinə çevrilir.
Vaşinqton–Bakı əməkdaşlığının yeni mərhələsi Prezident İlham Əliyevin uzunmüddətli və ardıcıl siyasətinin nəticəsi kimi qiymətləndirilir.
Strateji Tərəfdaşlıq Xartiyası Azərbaycanın qarşısında duran yeni hədəflərə nail olmaq üçün mühüm imkanlar yaradır. Bu sənəd iqtisadi və təhlükəsizlik əməkdaşlığını dərinləşdirir, sülh prosesinə əlavə impuls verir, Azərbaycanın beynəlxalq rolunu gücləndirir.
Beləliklə, Vensin səfəri və imzalanan sənəd Bakı üçün yeni geosiyasi reallıqların başlanğıcı kimi qiymətləndirilə bilər. Azərbaycan regional sabitliyin əsas təminatçılarından biri kimi mövqeyini möhkəmləndirərək daha geniş coğrafiyada aktiv aktor rolunu gücləndirir”.
