20 Yanvar xalqımızın qəhrəmanlığının, milli müstəqillik, azadlıq uğrunda mübarizəsinin və yenilməz iradəsinin rəmzi kimi müstəqil Azərbaycan tarixində xüsusi yer tutur.
Təpədən-dırnağadək silahlanmış keçmiş sovet ordusunun amansız hücumu xalqımızın azadlıq əzmini qıra bilmədi. Otuz altı il öncə qəhrəman Azərbaycan övladları canlarını doğma Vətənin müstəqilliyi yolunda qurban verərək şəhidlik zirvəsinə ucaldılar. Öz qanları ilə müstəqillik tariximizdə silinməz iz qoyan şəhidlərimiz xalqımızın azadlıq əzmini bütün dünyaya nümayiş etdirdi.
Həmin dövrdə azərbaycanlıların Ermənistandakı tarixi yurdlarından növbəti dəfə kütləvi şəkildə çıxarılması və Dağlıq Qarabağın Ermənistana birləşdirilməsi istiqamətində atılan addımlar cəmiyyətdə ciddi narazılıq doğurmuşdu. Bu ədalətsizliyə biganə qalmayan Azərbaycan xalqı küçələrə çıxaraq milli həmrəylik nümayiş etdirir və bu niyyətlərin qarşısını almağa çalışırdı.
Azərbaycan xalqının ədalətli tələblərini həll etmək, ermənilərin iddialarının qarşısını almaq əvəzinə sovet rəhbərliyi belə ağır vəziyyətdə Bakıya və ölkəmizin bir sıra bölgələrinə qoşun yeritmək qərarını verdi. Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə icra olunan bu dəhşətli faciə 147 nəfərin öldürülməsi, 744 nəfərin yaralanması, 841 nəfərin qanunsuz həbs olunması ilə nəticələndi.
Xalqımızın Ümummilli Lideri Heydər Əliyev 20 Yanvar faciəsindən dərhal sonra böyük təhlükələrə baxmayaraq, Azərbaycanın Moskvadakı daimi nümayəndəliyinə gələrək qətiyyətli mövqe nümayiş etdirdi. Vətəninin ağır sınaq qarşısında qaldığı həmin günlərdə Ulu Öndər açıq bəyanatla çıxış edərək baş vermiş qanlı hadisələrə siyasi qiymət verdi, cinayətkarların cəzalandırılmasını tələb etdi. Ümummilli Liderin tarixi müraciəti dünya ictimaiyyətinin faciə barədə məlumatlandırılmasında, bu cinayətin əsl mahiyyətinin beynəlxalq birliyə çatdırılmasında mühüm rol oynadı.
Ümummilli Lider Heydər Əliyevin təşəbbüsü ilə 1990-cı il noyabrın 21-də Naxçıvan Muxtar Respublikasının Ali Məclisi, daha sonra isə 1994-cü il martın 29-da Azərbaycan Respublikasının Milli Məclisi tərəfindən 20 Yanvar faciəsinə siyasi-hüquqi qiymət verən mühüm qərarlar qəbul olundu. Ulu Öndər 1990-cı ilin 20 Yanvar hadisələrini Azərbaycan xalqının həyatında taleyüklü dönüş mərhələsi kimi dəyərləndirir, zaman keçdikcə bu günün tarixi əhəmiyyətinin daha dərindən dərk ediləcəyini vurğulayırdı. Doğrudan da, 36 il əvvəl baş vermiş bu ağır faciə milli azadlıq hərəkatının zirvəsinə çevrilərək milli kimliyimizin formalaşmasına, xalqımızın birlik və həmrəyliyinin möhkəmlənməsinə güclü təkan verdi.
Ümummilli Liderin müəyyən etdiyi inkişaf konsepsiyası Azərbaycanı 1990-cı illərin əvvəllərində üzləşdiyi dərin böhran və məhv olmaq təhlükəsindən xilas edərək ölkəni sabitlik və tərəqqi yoluna çıxardı. Bu strateji xətt dövlətçiliyimizin möhkəmlənməsinə və Azərbaycanın parlaq gələcəyinin təmin olunmasına əsaslı zəmin yaratdı. Ulu Öndərin siyasi kursunu uğurla davam etdirən Prezident İlham Əliyevin müdrik və qətiyyətli rəhbərliyi ilə Azərbaycan böyük və tarixi nailiyyətlərə imza atdı, Ermənistanın işğalçılıq siyasətinə son qoydu, ərazi bütövlüyünü və dövlət suverenliyini tam bərpa etdi. Bu gün ölkəmiz tarixinin ən qüdrətli və şərəfli dövrünü yaşayır.
Şahin İsmayılov
Milli Məclisin deputatı
