Müasir dövrdə idman yalnız fiziki fəaliyyət sahəsi deyil, eyni zamanda dövlətin mədəni, sosial və strateji inkişaf göstəricilərindən biri kimi çıxış edir. Azərbaycan Respublikasında idmanın inkişafı təsadüfi və epizodik xarakter daşımır, əksinə, ardıcıl, məqsədyönlü və uzunmüddətli dövlət siyasətinin mühüm istiqamətlərindən biridir. Bu siyasət ölkə rəhbərliyi tərəfindən sistemli şəkildə həyata keçirilir və konkret proqramlar, infrastruktur layihələri, beynəlxalq tədbirlər və insan kapitalına yönəlmiş tədbirlərlə müşayiət olunur.
Azərbaycan Respublikasının Prezidenti İlham Əliyevin vurğuladığı kimi, idmanın inkişafı ölkədə dövlət siyasəti səviyyəsinə qaldırılmışdır. Bu siyasətin nəticəsi olaraq son illərdə idman sahəsində əldə edilən nailiyyətlər rekord göstəricilərlə ifadə olunur. Təkcə beynəlxalq yarışlarda 2000-dən çox medalın, o cümlədən 600-dən çox qızıl medalın qazanılması həyata keçirilən proqramların effektivliyini aydın şəkildə nümayiş etdirir. Medalların sayının ildən-ilə artması idmançı potensialının genişləndiyini və dövlət qayğısının real nəticələr verdiyini təsdiqləyir. Dövlət siyasətinin əsas sütunlarından biri müasir idman infrastrukturunun yaradılmasıdır. Azərbaycanda idman infrastrukturu faktiki olaraq sıfırdan qurulmuş və bu gün beynəlxalq standartlara cavab verən səviyyəyə çatdırılmışdır. Regionlarda Olimpiya İdman Komplekslərinin inşası idmanın kütləviliyini artırmaqla yanaşı, bölgələrdə yaşayan gənclərin idmana cəlb olunması üçün geniş imkanlar açmışdır. Gəncə və Yevlaxda yeni komplekslərin istifadəyə verilməsi ilə ölkə üzrə Olimpiya İdman Komplekslərinin sayı 46-ya çatmışdır ki, bu da regional balansın təmin edilməsi baxımından mühüm göstəricidir. İdman siyasətinin mühüm məqsədlərindən biri sağlam, fiziki və mənəvi cəhətdən güclü gənc nəslin formalaşdırılmasıdır. İdman təkcə sağlam həyat tərzinin təşviqi deyil, eyni zamanda gənclərin vətənpərvərlik ruhunda tərbiyə olunmasında mühüm vasitə kimi çıxış edir. Beynəlxalq arenalarda Dövlət Bayrağının qaldırılması gənclərdə milli qürur hissini gücləndirir və onların müzəffər xalqın nümayəndəsi kimi məsuliyyətini artırır.
Azərbaycanın beynəlxalq idman məkanında mövqeyinin möhkəmlənməsi də dövlət siyasətinin mühüm nəticələrindəndir. MDB Oyunları, Formula 1 Qran-Prisi, UFC turniri, gələcəkdə Şahdağda keçiriləcək Xizək üzrə Dünya Kuboku kimi nüfuzlu yarışlar ölkənin idman potensialını və təşkilati imkanlarını dünya ictimaiyyətinə nümayiş etdirir. Bu tədbirlər eyni zamanda turizmin inkişafına, ölkənin beynəlxalq imicinin yüksəlməsinə və regionlarda iqtisadi fəallığın artmasına ciddi töhfə verməkdədir.
Azərbaycanda son illərdə inşa edilən müasir idman kompleksləri, stadionlar, olimpiya mərkəzləri və idman arenaları beynəlxalq standartlara tam cavab verir. Paytaxt Bakı ilə yanaşı, regionlarda da yaradılan idman infrastrukturu ölkənin bütün ərazisində yarışların keçirilməsinə şərait yaradır. Bu obyektlər təkcə yarış günlərində deyil, ilboyu gənclərin və peşəkar idmançıların istifadəsində olur, kütləvi idmanın inkişafına xidmət edir.
Eyni zamanda, ölkəmizdə formalaşmış peşəkar təşkilati mexanizm beynəlxalq idman federasiyaları tərəfindən yüksək qiymətləndirilir. Yarışların təhlükəsizliyi, logistika, könüllülərin fəaliyyəti və texniki təminat sahəsində əldə edilən təcrübə Azərbaycanı etibarlı tərəfdaş kimi tanıdır. Ölkəmizdə keçirilmiş beynəlxalq idman yarışları Azərbaycanın adını dünya idman xəritəsində daha da möhkəmləndirmişdir. Bu yarışlar zamanı müxtəlif ölkələrdən minlərlə idmançı, rəsmi nümayəndə və azarkeş ölkəmizə səfər etmiş, Azərbaycanın mədəniyyəti, qonaqpərvərliyi və müasir inkişafı ilə yaxından tanış olmuşlar. İdman yarışları vasitəsilə qurulan bu əlaqələr xalqlar arasında dostluq və qarşılıqlı anlaşmanın möhkəmlənməsinə xidmət edir.
Niyaməddin Əsgərov,
Yeni Azərbaycan Partiyası Beyləqan rayon təşkilatının sədr müavini
