12 aprel həyata keçirilən bağlanış mərasimi ilə “AI4Culture: Mədəniyyətin Rəqəmsal Transformasiyası” layihə uğurla başa çatdı. Layihə Azərbaycan Respublikasının Mədəniyyət Nazirliyinin dəstəyi, Dünya Azərbaycanlıları Gənclər Təşkilatının təşkilatçılığı və Süni İntellekt Azərbaycan Platformasının tərəfdaşlığı ilə həyata keçirildi. Layihənin əsas məqsədi innovativ gənclərin iştirakı ilə süni intellektin mədəni irsə və kreativ sənayelərə inteqrasiyası istiqamətində yeni imkanlar yaratmaq idi.
Layihə boyunca iştirakçılar süni intellekt və rəqəmsal texnologiyaların əsasları, onların mədəniyyət sahəsində tətbiq imkanları, eləcə də real həyat nümunələri ilə tanış oldular. “Süni intellektlə tanışlıq”, “Prompt mühəndisliyi”, “AI əsaslı video hazırlama”, “Şəkil üzərində 3D modelləşdirmə”, “Virtual tur yaradılması”, “VR və AR texnologiyalarından istifadə”, “Sosial media üçün qısa video kontent istehsalı” və digər maraqlı mövzularda keçirilmiş 15-dən çox təlim və praktik sessiya iştirakçılar tərəfindən böyük maraqla qarşılandı.
Layihənin əsas məqsədi gənclərin süni intellekt sahəsində biliklərini artırmaqla yanaşı, mədəni irsin qorunmasında və təqdimatında innovativ üsulların tətbiqini təşviq etmək idi. İştirakçılar bir sıra vacib proqramlardan istifadə edərək vizual kontentlər, video podkastlar və 3D modellər hazırladılar. Həmçinin layihə çərçivəsində Azərbaycanın 5 nəfər mədəni xadiminin süni intellekt vasitəsilə video monolaqları hazırlandı, eyni zamanda 30 nəfər Mədəniyyət xadiminin məlumatlarını əks etdirən virtual muzey formalaşdırıldı.
Bağlanış mərasimində iştirakçılar sertifikatlarla təltif edildi və seçilmiş layihələr nümayiş etdirildi. Layihə təşkilatçıları gələcəkdə də bu istiqamətdə davamlı təşəbbüslərlə çıxış etməyi və iştirakçılarla layihənin məqsədinə uyğun fəaliyyətləri davam etdirməyi planlaşdırır.
