Bu gün Azərbaycan-Gürcüstan əlaqələri yeni bir mərhələyə daxil olub. Əməkdaşlığımız daha da inkişaf edir və möhkəmlənir. Gürcüstan Prezidentinin ilk xarici səfərini Azərbaycana etməsi bunun nümunəsidir. Bu addım ikitərəfli münasibətlərin strateji əhəmiyyət daşıdığını bir daha nümayiş etdirir.
Xatırladaq ki, bir müddət öncə IV Antalya Diplomatiya Forumu çərçivəsində Gürcüstanın Baş naziri İrakli Kobaxidze ilə Prezident İlham Əliyev arasında görüş baş tutmuşdu. Həmçinin ADA Universitetində təşkil olunan beynəlxalq forumda da Prezident Gürcüstanla münasibətləri yüksək qiymətləndirmişdi. Məhz Gürcüstan prezidentinin ölkəmizdə rəsmi səfərdə olması bir daha göstərir ki, qarşılıqlı etimad mühiti getdikcə genişlənir.
Yeri gəlmişkən, Azərbaycan və Gürcüstan prezidentlərinin mətbuata bəyanatlarla çıxışı olduqca böyük maraq doğurdu. Ölkə başçımızın qonşu Gürcüstanla bağlı səsləndirdiyi fikirlər regional və qlobal miqyasda hər iki ölkənin uğurlu tərəfdaşlığına önəmli mesajdır. Qeyd edildi ki, əgər biz bu gün Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil.
Azərbaycan və Gürcüstan bölgənin geosiyasi reallığında fəal və mühüm rol oynayır. İki ölkə arasında əməkdaşlıq xüsusilə nəqliyyat, kommunikasiya və enerji təhlükəsizliyi sahələrində çox ciddi səviyyəyə çatıb. Azərbaycan ilə Gürcüstanın birgə həyata keçirdiyi neft-qaz, nəqliyyat və kommunikasiya layihələri təkcə region üçün deyil, bütövlükdə Avrasiya məkanı üçün strateji mahiyyət daşıyır. Bu əməkdaşlıq sıradan bir tərəfdaşlıq deyil – bu, enerji və nəqliyyat marşrutlarının taleyini müəyyən edən, qlobal güc balansında yeni səhifə açan bir modeldir. Bakı-Tbilisi-Ceyhan, Bakı-Tbilisi-Ərzurum kimi magistral layihələr, Bakı-Tbilisi-Qars dəmir yolu kimi kommunikasiya arteriyaları Cənubi Qafqazın geosiyasi xəritəsini yenidən cızıb. Bu layihələr sayəsində region bir enerji və logistika dəhlizinə çevrilib, Azərbaycan və Gürcüstan isə bu böyük oyunda aparıcı aktordur. Qısası, Bakı ilə Tbilisinin birgə atdığı hər addım təkcə iki ölkənin deyil, Avrasiyanın gələcəyini formalaşdırır. Bu əməkdaşlıq yalnız bu günü deyil, sabahı da formalaşdıran tarixi ortaq iradənin göstəricisidir.
Azərbaycanın Gürcüstanla münasibətləri konstruktiv və gələcəyə yönəlib. Hər iki ölkə bir-birinin mövqeyini daim dəstəkləyir. Azərbaycan daim Gürcüstana dəstək göstərib, Gürcüstan da beynəlxalq platformalarda ölkəmizin haqlı mövqeyini müdafiə edib.
Təəssüf ki, hər iki ölkə Avropa İttifaqının və digər beynəlxalq təsisatların qərəzli münasibəti və ikili standartları ilə qarşı-qarşıya qalır. Buna baxmayaraq, Azərbaycan və Gürcüstan öz hədəflərinə birlikdə və ardıcıl şəkildə irəliləyir. Bu proses daha da sürətlənir və inkişaf edir. Əminliklə demək olar ki, bu səfər iki ölkə arasında münasibətlərdə yeni mərhələnin başlanğıcı olacaq. Qarşıda yeni layihələr, əməkdaşlıq istiqamətləri və perspektivlər durur. Bu da Azərbaycan-Gürcüstan əlaqələrinin möhkəmlənməsinə və bölgədə sülh, əməkdaşlıq mühitinin dərinləşməsinə ciddi töhfə verəcək.
Milli Məclisin deputat Ceyhun Məmmədov
