Azərbaycan və gürcü xalqları əsrlər boyu dostluq, mehriban qonşuluq şəraitində yaşayıblar. İki ölkə arasındakı əlaqələr də bu təməl üzərində qurulub və bu gün bütün istiqamətlərdə uğurla inkişaf edir. Bu münasibətlər regionun inkişafında, dost xalqlarımızın rifahının yüksəldilməsində müstəsna önəm daşıyır.
Bu sözləri AZƏRTAC-a açıqlamasında Milli Məclisin Gənclər və idman komitəsinin sədri Şahin İsmayılov səsləndirib.
Yüksək dinamika ilə inkişaf edən Azərbaycan-Gürcüstan münasibətlərinin genişləndirilməsində yüksəksəviyyəli qarşılıqlı səfərlərin, aparılan müzakirələrin mühüm rol oynadığını söyləyən komitə sədri qeyd edib ki, bu təmaslar əməkdaşlıq üzrə mövcud gündəliyi, perspektiv imkanları nəzərdən keçirmək, birgə atılacaq addımları müzakirə etmək baxımından önəmlidir. Bu xüsusda, Gürcüstanın Prezidenti Mixeil Kavelaşvilinin Azərbaycana səfəri dost ölkələrimiz arasında strateji xarakter daşıyan münasibətlərin daha da inkişafına təkan verəcək.
Ş.İsmayılov bildirib ki, Azərbaycanın təşəbbüsü ilə reallaşdırılan regional və qlobal əhəmiyyətli layihələr ölkəmizin beynəlxalq münasibətlər sistemindəki yerini və rolunu gündən-günə möhkəmləndirir. Azərbaycan ilə Gürcüstan tərəfdaş və dost ölkələr kimi bu layihələrin icrasında böyük rola malikdirlər. Prezident İlham Əliyev gürcü həmkarı ilə birgə mətbuata bəyanatında qeyd etdi ki, bu gün Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil. Azərbaycan və Gürcüstan bu gün yaşıl enerji dəhlizinin yaradılması prosesində də yaxından iştirak edirlər.
“Eyni zamanda, Azərbaycan-Gürcüstan əməkdaşlığı qitələrarası nəqliyyat bağlantıları üçün önəmli rol oynayır. Ötən illər ərzində ölkələrimizin tranzit potensialının gücləndirilməsi sahəsində mühüm işlər görülüb. Bakı-Tbilisi-Qars dəmir yolu xəttinin inşası bu istiqamətdə mühüm addımdır. Ümumilikdə görülən işlər ölkələrimiz üçün yeni imkanlar yaradır. Bu xüsusda, Orta Dəhliz layihəsi böyük iqtisadi səmərəyə malikdir”, – deyə Şahin İsmayılov vurğulayıb.
Komitə sədri qeyd edib ki, iki ölkə arasında bütün sahələrdə gündən-günə genişlənən əməkdaşlıq region üçün yeni perspektiv imkanlar vəd edir. Bu isə regiona sülhə və sabitliyə əsaslanan davamlı, dayanıqlı inkişafa şərait yaradacaq.
