Məlumdur ki, müasir dövrdə hər bir dövlətin beynəlxalq münasibətlər sistemində layiqli mövqe tutaraq özünü bərabərhüquqlu tərəfdaş kimi təsdiqləməsi, milli maraq və mənafeyini yüksək səviyyədə müdafiə etməsi, diplomatik əməkdaşlıq sferasında həlledici uğurlara imza atması onun çağdaş dünya nizamının reallıqlarına cavab verən xarici siyasəti necə qurmasından bilavasitə asılıdır. Müşahidələr göstərir ki, beynəlxalq hüquq prinsiplərini əsas tutaraq praqmatizmə, qarşılıqlı-faydalı əməkdaşlığa əsaslanan xarici siyasət yürüdən, çoxqütblü əməkdaşlığa üstünlük verən ölkələr tez bir zamanda qarşıya qoyduqları məqsədlərə nail ola bilirlər. Beynəlxalq hüquq normalarına, qarşılıqlı inam və etimada, faydalı əməkdaşlığa əsaslanan xarici siyasət həyata keçirən Azərbaycan qonşu dövlətlərlə münasibətlərini daha da inkişaf etdirməyə nail olub, regionda sülh, sabitlik, iqtisadi əməkdaşlıq təşəbbüslərini fəal surətdə dəstəkləyib. Qonşu ölkələr hazırda regionda tam müstəqil siyasət yeridən Azərbaycanı strateji tərəfdaş və dost ölkə sayır, respublikamızla hərtərəfli əməkdaşlığa böyük maraq göstərirlər. Bu baxımdan, Azərbaycan-Gürcüstan münasibətləri xüsusi vurğulanmalıdır. Hələ, Sovetlər Birliyinin tərkibində olarkən, Azərbaycan ilə Gürcüstan respublikaları arasında iqtisadi və mədəni əlaqələr mövcud olmuş, iki xalq mehriban qonşuluq şəraitində yaşamışlar. Öz dövlət müstəqilliklərini əldə etdikdən sonra, Azərbaycan-Gürcüstan əlaqələri daha da genişləndirilmiş, 1992-ci ildə iki ölkə arasında diplomatik münasibətlər qurulmuşdur. Beynəlxalq əlaqələrin genişləndirilməsi, Cənubi Qafqazda nisbi siyasi sabitliyin bərqərar olması, Transqafqaz, Transxəzər magistralının təhlükəsizliyinin təmin edilməsi və digər istiqamətlər üzrə inkişaf etdirilən münasibətlər getdikcə daha da dərinləşmiş, möhkəmləndirilmişdir. 1995-ci ildə Bakıda Gürcüstanın, 1996-cı ildə isə, Tbilisidə Azərbaycanın səfirliyi açılmışdır. 1998-ci ildə Azərbaycan ilə Gürcüstan sərhədində yeni körpü salınması isə, ölkə vətəndaşları arasında dostluq münasibətlərinin inkişafında mühüm rol oynamışdır. Cənubi Qafqaz regionunda getdikcə müttəfiqlik səviyyəsinə yüksələn əlaqələr özünün yeni inkişaf mərhələsinə yüksəlmişdir. Bakı-Supsa, Bakı-Tbilisi-Ceyhan, Bakı-Tbilisi-Ərzurum və TRASEKA, Bakı-Tbilisi-Qars və Trans-Anadolu Qaz Boru Kəməri kimi qlobal enerji, nəqliyyat-kommunikasiya layihələrini birgə reallaşdıran Azərbaycan ilə Gürcüstan GUAM, Qara Dəniz İqtisadi Əməkdaşlıq Təşkilatı, eləcə də, digər qurumlar daxilində ikitərəfli strateji əlaqələrini daha da şaxələndirmişlər. Belə ki, 1998-ci ildə tarixi İpək Yolunun bərpası üzrə beynəlxalq konfrans keçirilmiş, 1999-cu il aprel ayının 17-də isə, Bakı-Supsa neft kəməri işə salınmışdır. Bakı-Tbilisi-Ceyhan neft ixrac kəmərinin Azərbaycan hissəsi 2005-ci il may ayında, Gürcüstan hissəsi isə oktyabr ayında istifadəyə verilmişdir.
Bu gün, Azərbaycan ilə Gürcüstan arasında qarşılıqlı-faydalı əməkdaşlıq münasibətləri mövcuddur və ölkələr arasındakı əlaqələr əsl regional əməkdaşlıq nümunəsidir. Onu da qeyd etmək lazımdır ki, ölkələr arasındakı strateji tərəfdaşlıq münasibətləri mütəmadi surətdə yeni keyfiyyət çalarları ilə zənginləşməkdədir. Azərbaycan-Gürcüstan əlaqləri dostluq, etibarlı tərəfdaşlıq səviyyəsində inkişaf etdirilir. Hər İki ölkə arasında ticarət, investisiya, maliyyə, bank, enerji, nəqliyyat, kənd təsərrüfatı, idman, təhsil, mədəniyyət və başqa sahələri əhatə edən əməkdaşlıq həyata keçirilir. Daxili və xarici siyasətində dünya ölkələri ilə çoxtərəfli əməkdaşlıq əlaqələrinə böyük önəm verən, dostluq, etibarlı tərəfdaşlıq çərçivəsində milli maraqlarını qoruyan müstəqil Azərbaycan ilə Gürcüstan arasında illər öncə qurulmuş əlaqələr dinamik sürətlə inkişaf edir. Sağlam təməllər üzərində qurulmuş bu əlaqələr Cənubi Qafqazın iqtisadi potensialın artmasına, eyni zamanda tərəfdaşlıq əlaqələrinin genişlənməsinə xidmət edir. Hər iki ölkə arasındakı strateji münasibətləri möhkəmləndirən fundamental faktorlardan biri də regional təhlükəsizlik sahəsindəki əməkdaşlıq əlaqələridir. Bununla bağlı müxtəlif dövrlərdə qarşılıqlı səfərlər təşkil edilir, təhlükəsizliyə və əməkdaşlığa dair ən aktual məsələlərlə əlaqədar olaraq dialoqlar keçirilir, məsləhətləşmələr aparılır. Baş tutan rəsmi səfərlər zamanı nəinki siyasi və iqtisadi sahələrdəki əməkdaşlıq əlaqələri müzakirə edilir, həmçinin, regional təhlükəsizliklə bağlı başlıca tərəfdaşlıq əlaqələri və müvafiq məsələlər gündəm mövzusu kimi çıxış edir.
Sabit Mehdiyev,
Yeni Azərbaycan Partiyası Beyləqan rayon təşkilatının məsləhətçisi
