Gənclərin paytaxtı Mingəçevirdə “Gənclərin şəxsi inkişaf düşərgəsi” başlayıb. Proqrama uyğun olaraq tədbir çərçivəsində Azərbaycan Respublikası Gənclər Təşkilatları Milli Şurasının (NAYORA) baş katibi Ramin Həbibzadənin çıxışı ilə rəsmi açılış olub.
Sonra isə iştirakçıların şəbəkələşməsi məqsədilə sürətli tanışlıq oyunları təşkil edilib.
Bu barədə AZƏRTAC-a NAYORA-nın mətbuat xidmətindən məlumat verilib.
Həmçinin Milli Məclisin deputatı Aydın Mirzəzadə ilə gənclərin interaktiv formatda görüşü keçirilib. Deputat tərəfindən iştirakçıların sualların cavablandırılıb, təklifləri dinlənilib.
Ardınca Avropa Tələbələr Forumu – Bakı İctimai Birliyinin prezidenti Cəsur Mədətzadənin “Liderlikdə dinləmə bacarığının önəmi” mövzusunda seminarı baş tutub. Azərbaycan Skautlar Assosiasiyasının nümayəndəsi Qoşqar Qurbanovun təlimçiliyi ilə ikimərhələli “Komanda quruculuğu oyunları” ilə günə yekun vurulub.
Qeyd edək ki, görüş Gənclər və İdman Nazirliyi, Gənclər Fondunun dəstəyi və NAYORA-nın təşkilatçılığı ilə keçirilir.
